El Gobiernu asegura que Coxersa va tratar namás los residuos de los conceyos asturianos

El Consorciu pa la Xestión de Residuos Sólidos d'Asturies (Coxersa) nun va tratar residuos procedentes de fuera, según aseguró’l Gobiernu. ACA alertó esta selmana de la posibilidá de qu’Asturies fuera nel futuru basureru d’otres comunidaes.
 
Dende’l Gobiernu afirmaron güei que les plantes de reciclaxe, compostaxe, biometanización y valorización enerxética que va desarrollar nos próximos años nel marcu del so Plan de Futuru 2002-2025 nun van tratar residuos urbanos procedentes d'otres comunidaes autónomes, saliendo asina al pasu de les sospeches de l'Agrupación de Colectivos Asturianos (ACA). La capacidá pa procesar residuos de caúna d'estes instalaciones planióse en función de les necesidaes específiques d'Asturies, según aseguraron dende l’Executivu, considerando los índices históricos de producción de residuos urbanos y industriales asimilables a urbanos que depositen nel Basureru Central d'Asturies y qu'algamen una media de 770.000 tonelaes al añu na última década.
 
La incineradora prevista, que refuga una bona parte de la población, va tener una capacidá añal de 420.000 tonelaes, qu'equivalen a les que van constituyir la fracción restu de los residuos urbanos y asimilable a urbanos provenientes de los conceyos asturianos nel 2016, una vez s'agote la capacidá del Basureru Central y se pongan en marcha toles plantes de reciclaxe, compostaxe, biometanización y clasificación de basoria bruta previstes nel Plan de Futuru. Un total de cuatro xuniones temporales d’empreses opten a la construcción de la planta, que Coxersa pretende axudicar en payares.