El Gobiernu aprueba una prórroga pal pagu d’hipoteques a trabayadores afeutaos pola crisis del coronavirus

El Conseyu de Ministros d’esti martes aprobó midíes económiques y sociales nueves p’afrontar la situación que vive l’estáu pola pandemia de COVID-19. Entes elles ta la posibilidá de prorrogar el pagu d’hipoteques a aquelles persones afeutaes polos impautos llaborales d’esta crisis, según confirmó'l presidente Pedro Sánchez.

El Gobiernu estatal yá comunicó a los bancos la so intención, que permitirá a persones afeutaes por un Espediente de Regulación Temporal de Emplegu (ERTE), a aquellos trabayadores que pierda el so puestu y a los autónomos que vean amenorgaos de forma importante los sos ingresos, prorrogar el pagu de la hipoteca de la so vivienda habitual mientres dure l’estáu d’alarma. A les 15.45 hores, na so comparencia posterior al Conseyu de Ministros, confirmó la midida.

El deséu de Xuníes Podemos de facer lo mesmo col alquiler tuvo sobre la mesa, pero nun salió alantre por mor de les duldes llegales por ser un contratu ente particulares. Otra de les decisiones ye la prohibición de cortar los servicios básicos, como la lluz y l’agua, a los coleutivos más vulnerables.

200.000 millones

Na so comparecencia, Sánchez tamién confirmó que’l Gobiernu va movilizar 200.000 millones d’euros “pa que naide nun quede atrás, sobre manera los qu’agora van necesitar muncha más proteición”.