El Gobiernu aprueba un proyeutu de presupuestos de 4.226 millones condenáu al fracasu

|
Presupuestos xenerales 2017

El Conseyu de Gobiernu aprobó esti llunes un proyeutu de presupuestos de 4.226 millones d’euros pal 2017. Estes cuentes lleguen ensin el sofitu de nenguna fuercia parllamentaria, tres la negativa de Podemos a apoyales, polo qu’Asturies paez condenada a una segunda prórroga presupuestaria.

El presupuestu de la FSA aumenta en 104 millones y plantega un gastu social que xube a 2.903 millones, lo que supón el 68,7 por cientu del total. La inversión productiva, mentes, asítiase nos 311 millones y propónse como novedá fiscal el cambiu del impuestu de sucesiones al aumentar el mínimu exentu hasta los 200.000 euros.

El gastu nel capítulu de Sanidá llega hasta los 1.683 millones, casi'l 40 por cientu del total, con una crecedera importante de la inversión (65 por cientu más) que redundaría na meyora de centros de salú y otros equipamientos, asina como nos servicios informáticos del ámbitu sanitariu.

A Educación destínense 778 millones, un 18,4 por cientu. Nesti capítulu destaca la meyora de la tresferencia a los conceyos pal financiamientu de la etapa educativa de 0 a 3 años y los 700.000 euros que se conseñen pa la convocatoria d'oposiciones docentes d'enseñanza primaria, lo que va contribuyir a la estabilización del profesoráu interín.

Al apartáu de Bienestar y Cohesión Social destínense 441 millones, un 10,4 por cientu del total. Les necesidaes del salariu social van cubrise con una dotación de 105 millones y el presupuestu del ERA va aumentar nun 3,5 por cientu.

Pal 2017, l'asistencia xurídica gratuita va recibir la mayor asignación desque s'asumieron les competencies va diez años, con una dotación de 5,5 millones. Tamién nel ámbitu xudicial, les cuentes incluyen partíes pa los xulgaos nuevos de Piloña y Ḷḷuarca.

Dos millones más pa Turismu

Los presupuestos recueyen una dotación de 155 millones pa les polítiques de Promoción Económica, Emplegu y Investigación. El presupuestu del Serviciu Públicu d'Empléu (Sepepa) xube de 83 a 89 millones.

Tamién se va dar cobertoria al Plan de Ciencia, Teunoloxía y Innovación, que va contar con casi 78 millones. Asina mesmo, el presupuestu pa Turismu increméntase en dos millones, lo que va dexar caltener les meyores nes conexones aérees y la promoción internacional d'Asturies.

Per otra parte, la Universidá d’Uviéu va cuntar con una partida de 128 millones, cantidá a la qu'hai que sumar 7 millones más n'aportaciones pa I+D+i y otos 2,3 pa places venceyaes.

Recupéresen les ayudes a les agrupaciones de defensa sanitaria ganadera

Pal Mediu Rural tán presupuestaos caasi 200 millones, con una medría sustancial de les ayudes a la incorporación de llabradores nuevos y modernización d'esplotaciones agraries, que crecen dende los 8,5 a los 9,4 millones. El presupuestu recupera les ayudes a les agrupaciones de defensa sanitaria ganadera y aumenta l’asignación pa les indemnizaciones polos daños causaos pola fauna montesa.

Les inversiones en tresportes, carreteres y puertos van xubir a 108 millones. Mentes, nel apartáu de cooperación local recuéyense 158,6 millones pa sofitar a los conceyos. Dientro d'esta llinia, el Fondu de Cooperación Municipal va cuntar con una partida de 6.180.000 euros.

Contador Estadistiques