El Gobiernu aprobó un centru d'interpretación de los afayos de Veranes

La Conseyería de Cultura del Gobiernu asturianu aprobó esti miércoles en conseyu de Gobiernu la so participación nel proyectu pa la recuperación y el conocimientu de los afayos arqueolóxicos de Veranes, na xixonesa parroquia de Cenero. El conceyu de Xixón ye quien entama esti proyectu que va tener un coste de cerca de 1,2 millones d'euros. Pa llevalu alantre, el Gobiernu asturianu va roblar un conveniu col conceyu pol que l'alministración autonómica va apurrir 300.000 euros pa los llabores nos restos arqueolóxicos, que van rematar cola construcción d'un centru de recepción de visitantes nel que van esponese los resultaos de les escavaciones que vienen faciéndose en Veranes dende l'añu 1997 y les pieces y restos más importantes de les mesmes.

Les escavaciones, dirixíes pola arqueóloga de la Universidá Autónoma de Madrid Carmen Ochoa, descubrieron un llugar con distintes estructures y construcciones qu'entamen nes dómines postreres del imperiu romanu, espurriéndose la ocupación del llugar hasta l'alta edá media y conseñándose nel yacimientu la existencia de trabayos metalúrxicos, una basílica y una necrópolis medieval con enterramientos hasta'l sieglu XIII.