El Gobiernu amplía'l presupuestu pa lluchar contra l'aviespa asiática

|
Aviespa asiática por BlueGinkgo

Esta midida permitirá retirar tolos niales que s’avisaron, rebaxar los tiempos de respuesta y adelantar el trampéu, según comuniquen dende la Conseyería de Desarrollu Rural.

El Gobiernu va aumentar en 231.000 euros el presupuestu pal Plan d’Actuación y Control de l’Aviespa Asiática (Vespa velutina nigrithorax) de manera que, en total, la partida p’anguaño xube a 481.000 euros. Esta midida pa lluchar contra la espansión de la plaga supón triplicar el presupuestu inicial pal 2019, afitáu de mano en 150.000 euros, cola mira d’aumentar los equipos que s’encarguen de la verificación y eliminación de los niales, y dotase de medios y materiales.

El númberu de niales destruyíos aumentó nun 300 por cientu al respeutive del 2018. Los fondos nuevos van dexar agora facer frente a la eliminación de 2.000 más de los previstos, colo qu’a últimos d’añu cúntase algamar los 5.000 niales desaniciaos.

Otra manera, esta movilización de recursos adicionales va ayudar a siguir amenorgando progresivamente los tiempos medios de respuesta. Nesti sen, implantóse un sistema de clasificación que da prioridá a aquellos niales que suponen más riesgu pa la población y l’actividá económica, frente a los asitiaos en sitios apartaos y a munchu altor.

Asina, nuna escala de 1 a 4, el nivel 1 ye’l de prioridá máxima. Esti modelu desenvuélvese de forma paralela a les actuaciones que, con calter inmediatu, realicen los servicios d’emerxencia en situaciones especiales.

Los tiempos de respuesta énte los avisos, a tenor d’esa escala, foron amenorgando dende los 10,38 díes de los recibíos n’agostu, a los 7,69 de setiembre y los 4,01 d'esti mes. La previsión ye que la movilización d’estos recursos adicionales dexe dir rebaxando los plazos progresivamente.

3.777 notificaciones de niales

Otra aición preventiva nueva qu’autorizó la conseyería pa frenar la espansión de la especie exótica invasora ye’l trampéu de reines na fase anterior a la hibernación, hasta últimos d’añu. Amás, dende’l mes de setiembre, la conseyería entamó delles reuniones cola Federación Asturiana de Conceyos (FACC) y asociaciones del sector pa reforciar la coordinación na llucha contra la plaga.

Tocante al balance de les actuaciones feches recibiéronse 3.777 notificaciones de niales, de los que se verificaron 3.265 y se desaniciaron 2.696. Del total, nunos 500 casos trátase d’otres especies.

Semeya obra de BlueGinkgo baxo llicencia CC BY-SA 3.0.

Contador Estadistiques