El Gobiernu afirma que “nun ye verdá que la mayoría de les herencies paguen más n’Asturies”

|
Melania Álvarez García impuestu de socesiones

“El 99 por cientu de les herencies en llinia direuta nun paguen nada n’Asturies y sí lo faen Madrid, por exemplu”, dixo Álvarez.

La vocera del Gobiernu recordó, tres el Conseyu de Gobiernu, entrugada a razón de les últimes noticies sobre l’impuestu de socesiones –ente elles el descensu al mínimu en Castilla y Lleón, y el refugu del Congresu a la so supresión– y la intervención del presidente Adrián Barbón en redes tres una información espublizada nel diariu 'El País' al respeuto, qu'Asturies cuenta “con un sistema fiscal progresivu, qu’esixe una mayor tributación a aquelles rentes más altes. Nun tamos a favor, como yá diximos n’otres ocasiones, d’una carrera de rebaxes fiscales indiscriminaes”.

Nesi sen, Melania Álvarez García apuntó que “la fiscalidá xusta, equitativa, responsable y progresiva garantiza los servicios públicos y contribúi a la equidá social. Nun tenemos más que mirar la capacidá de respuesta de los servicios públicos a la crisis sanitaria nestos meses pa ponelo como exemplu”.

Respeuto a socesiones aseguró que “nun ye verdá que la mayoría de les herencies paguen más n’Asturies. El 99 por cientu de les herencies en llinia direuta nun paguen nada n’Asturies y sí lo faen Madrid, por exemplu. Namái les herencies más altes, al rodiu del 1 por cientu, y apenes 200 contribuyentes al añu, paguen esti impuestu n’Asturies”.

Harmonización y normativa estatal

“Hai que frayar cola idea de que les empreses van a otres comunidaes autónomes pola fiscalidá”, siguió. “Ye más, el númberu d’empreses n’Asturies, enates de la pandemia, taba en medra continua dende l’añu 2014 porque la fiscalidá empresarial ye básicamente la mesma a lo llargo de tol territoriu nacional: tanto l’IVA como l’impuestu de sociedaes son tributos estatales, non autonómicos”, esplicó.

Por último, afirmó que la posición del Gobiernu ye que l’impuestu de socesiones, que “tien un función redistribuidora”, “nun precisa de supresiones, sinón d’una harmonización y normativa estatal”.

Semeya obra d'Armando Álvarez.

Contador Estadistiques