El Gobiernu acude a los tribunales pa reclamar al Estáu otros 21,5 millones de fondos mineros

El Conseyu de Gobiernu decidió acudir otra vuelta a los tribunales pa reclamar nesta ocasión 21,5 millones d'euros d’obres yá executaes incluyíes nos convenios de los fondos mineros. Ésti ye’l cuartu recursu contencioso-alministrativu nesi sen, sumando una demanda total de 355,5 millones.

El primeru, de 213 millones, ye l’orixe de la reclamación qu’agora se plantega al traviés de recursos contencioso-administrativos contra la desestimación, por silenciu administrativu, de los recursos de reposición presentaos contra les resoluciones del Institutu pa la Reestructuración de la Minería del Carbón (IRMC) que declaren la perda del derechu al cobru de les ayudes concedíes nun primer momentu. Llueu llegaríen otru de 53 millones y un terceru de 68, al que se suma ésti de 21,5 millones qu’inclúi les cantidaes que correspuenden al Gobiernu del país pola execución de 20 proyeutos de fondos mineros.

Trátense, poro, de convenios incluyíos na sentencia de 28 d’ochobre del 2013 que daba la razón al Executivu asturianu nos sos plantegamientos. El fallu estimó parcialmente’l recursu contenciosu interpuestu pol Gobiernu énte la inactividá alministrativa del Ministeriu d’Industria, Enerxía y Turismu, que nun cumplió les obligaciones económicas resultantes de la execución de los convenios de collaboración roblaos.

Según informa l’Executivu, la sentencia instaba al ministeriu a “determinar, en cada casu, les incidencies que concurrieren na execución de los convenios de collaboración pleitosos, cola identificación de los posibles incumplimientos, a los efeutos d’establecer el pagu de les cantidaes que nel so casu procedieren, previa audiencia al Principáu de les alegaciones y subsanación de les posibles deficiencies apreciaes”. Asina Industria analizó los 57 convenios incluyíos en dichu recursu y, posteriormente, en febreru y mayu d’esti añu, emitió sendes resoluciones nes que determinó la perda del derechu de cobru en 20 actuaciones, presentando entós Asturies los recursos de reposición, desestimaos por silenciu alministrativu, qu’orixinen agora un pleitu nuevu nos tribunales.

Les obres executaes

Les venti actuaciones yá executaes y entovía nun cobraes son: Muséu Etnográficu de la Llechería de Morcín (546.300 euros); proyeutu téunicu pa un polígonu industrial en Cabanaquinta (149.640), en Casu (222.796,80) y en Degaña (136.880); proyeutu Angliru-Base (2.360.094,39); Ecomuséu Mineru Valle de Samuño (6.500.000); acondicionamientu de pistes forestales n’Ayer (330.678,37); rehabilitación de fontes y llavaderos  públicos en Samartín del Rei Aurelio (144.388,86); infraestructures básiques pal desarrollu del Altu Ayer (3.496.155,36); acondicionamientu de la carretera Cao-La Carrera (411.402,98); saniamientu, depuración y pavimentación de Viḷḷacibrán (585.746,37); pavimentación de caminos dende Robléu de San Cristuébalu a Las Colinas (93.245 euros); redaición de siete proyeutos téunicos de carreteres  (1.309.240,96); Plan de dinamización turística al rodiu los recursos hídricos de la rexón de Fontes del Narcea (1.606.986,68); Plan de suelu de vivienda pa mozos (2.554.315,49); construcción de llocales y sales d’ensayu nel barriu La Peña de Mieres (211.600); actuaciones na rede de distribución d’agües n’Ibias (174.124,70); abastecimientu d’agua a Santibanes de Murias (148.427,61) y Bo (249.962,09); y saniamientu, reposición d’abastecimientu y pavimentación de Viḷḷarmental (272.965,00).