El gasoil verde acelera n’Asturies

La empresa Bionorte, asitiada en polígonu de La Florida, en Samartín del Rei Aurelio, tien previsto doblar esti añu 2006 la producción de biodiesel, pasando de los 12.000 llitros diarios a los 24.000.

Amás de la xuba de la producción, la empresa asturiana que produz combustible ecolóxico a partir d'aceites vexetales cuenta con crear un mercáu internu de biodiesel al traviés de la distribución del so productu en gasolineres ensin abanderar por grandes multinacionales.

Ello ye qu'actualmente cerca del 90% de la producción de Bionorte, filial del grupu d'inxeniería Isastur, empobínase a la esportación, sobremanera a Austria y Alemaña. El vender biodiesel nes gasolineres del país ye ún de los oxetivos más de vieyo de la empresa, que yá contaba l'añu pasáu con poder apurrilo, pero tanto les torgues alministratives como'l factor del preciu final del biodiesel tan retrasando esta llegada a los surtidores independientes del país, que son un total de venti. Ello ye que'l biodiesel ha vendese mecío con gasóleo convencional mineral, que les petroleres vienden a Bionorte a precios de mercáu convencionales, colo que'l preciu del gasóleo mecío de mineral y biodiesel ye más altu que'l del gasoil convencional.


El biodiesel, que se consigue al traviés d'un procesu de tresesterificación de la grasa vexetal -aceite de cocinar usao mayormente- ayuda a menguar el consumu, les emisiones contaminantes y meyora l'engrase del motor. Les flotes de coches de tresportes urbanos y vehículos d'empreses son de momentu'l principal consumidor nel mercáu internu del gasoil "verde" asturianu.