El Garrapiellu convoca'l XII concursu de cuentos curtios

La Tertulia Cultural El Garrapiellu convoca esti añu la XII edición de los sos tradicionales concursos lliterarios. Con un primer premiu de 900 euros y un accesit de 300, el Concursu de Cuentos Curtios qu'organiza la veterana terulia de Xixón ye, ensin dulda, una de les cites más llambiones y de más prestixu pa los escritores del país, que tendrán qu'unviar testos de doce o menos folios con tema llibre enantes del 29 de mayu, que ye la fecha tope pa presentar orixinales al separtáu de correos 8133 - 33280 de Xixón.

Pa rapacinos d'hasta 4º d'ESO, la TC El Garrapiellu convoca'l concursu de redacción, que va premiar a los rapacinos que recueyan de la famila o de xente que conozan dalguna añada, cantar tradicional o de xuegos, de corru, romance o cualquier manifestación de la cultura oral astur y la espliquen nuna redacción a la que puen amestar dibuxos o ilustraciones gráfiques. Pa más información sobre los concursos, que cuenten col sofitu de la Conseyería de Cultura, el Garrapiellu dexa'l teléfonu 699-30 67 40.