El gallego-asturiano torna a la Xunta Xeneral, nesta ocasión tamién de la mano de PP y Ciudadanos

Podemos llevó otra vuelta a la Xunta Xeneral la proposición non de llei, presentada agora en gallego-asturiano, sobre’l Museo Etnográfico de Grandas de Salime valtada nel Plenu del pasáu 15 de xunetu tres seis votaciones. Les enmiendes de PP y Ciudadanos entregáronse tamién nesti idioma y Rafael Palacios usó esta llingua na so intervención, esta vegada ensin interrupciones de VOX.

Nun emplegó nesta ocasión el gallego-asturiano Álvaro Queipo, diputáu del PP pol occidente y defensor del patrimoniu llingüísticu d’esta fastera del país, como yá fixera n’otres ocasiones na Cámara. Sicasí, el so grupu presentó la enmienda na llingua del Eo-Navia, documentu firmáu por Teresa Mallada.

Siguió’l mesmu camín Ciudadanos, con robla de la vocera nueva Susana Fernández Álvarez, sustituta de Laura Pérez Macho por decisión del partíu. Defendió la posición de la formación naranxa Luis Armando Fernández Bartolomé, que, en castellano, sí fixo referencia al gallego-asturiano na so intervención: “Recursos castreños, la propia fala de la zona, el camín de Santiago que pasa, el Chao Samartín, el banzáu…, un montón de recursos culturales que tienen que servir pa la recuperación económica de la zona”, apuntó.

Agradecimientu de Palacios pol usu l’idioma

“En primer llugar agradecer a los diputaos Queipo y Bartolomé les enmiendes nuna llingua propia d’Asturies”, espresó Palacios enantes d’aceptar les enmiendes de los dos grupos. Esta vegada la PNL sí salió alantre con 23 votos a favor y 22 en contra, los de la FSA y los de VOX.

Na imaxe, Fernández Bartolomé.