El Galipote, en Xivares y Valdés

El web de la Universidá de Vigo, única institución gallega que ta apurriendo información y datos en medio del silenciu institucional sobre la marea negra del Prestige, espubliza esta mañana una semeya de satélite de la costa asturiana sacada na mañana del día 3 d'avientu onde se ve una concentración de galipote bien curiosa pasando enfrente del Cabu Peñes.

La imaxe d'esta semeya y l'apaición ayeri de galipote nuna playa de Cantabria confirmen que parte de la marea negra qu'afuega Galicia garró'l cursu d'una corriente marina que que pasa per tola costa cantábrica a l'altura del cantil submarín onde acaba la plataforma continental. Según pudo saber Asturies.com, esta corriente actívase durante l'inviernu nel hemisferiu boreal y avanza a unos 20cmts per segundu, yendo a estrellase contra la costa de Francia, lo qu'esplica'l nerviosismu y alerta de l'autoridá francesa, que yá tien preparáu el plan d'emerxencia "Polmar". Anque la corriente circula unos kilómetros dientro la mar, ello nun quita pa que l'aire o otros factores puedan emburriar parte del galipote pa contra la costa.

En previsión de lo que pueda pasar, ayeri ficiéronse prebes con barreres anticontaminación na playa d'El Puntal, na ría de Villaviciosa, mientres nun dexen d'apaecer páxaros engalipotiaos.

ÚLTIMA HORA-IMPORTANTE: L'últimu avisu acabante de lleganos a la redacción diz qu'acaben d'apaecer les primeres manches de galipote en dellos puntos del conceyu de Valdés y na playa de Xivares, en conceyu Carreño. Apurriremos más información.