El gaiteru Guti prepara discu

El gaiteru Guti entama'l mes qu'entra la grabación d'un discu, va facelo xunto una banda de músicos bien conocíos.El próximu tres de febreru'l gaiteru José Manuel Fernández Gutiérrez, más conocíu por Guti, pondráse a grabar nos estudios "Tutu" el so nuevu discu pa la discográfica "L'Aguañaz". Pa la grabación cuenta cola collaboración dellos músicos como Fernando Arias nes percusiones y programaciones, Alejandro Espina col baxu eléctricu y contrabaxu, Jaime Belaustegui na bateria, Joan Balmori, hermanu de Paul Balmori bouzoukista de "Corquiéu", tocará les guitarres y el bouzouki, Jacobo de Miguel nel pianu y nos teclaos, y Harry Price col vigulín. Nel discu vamos topar un cincuenta por cientu de composiciones del propiu gaiteru y un cincuenta por cientu de temes tradicionales. La producción del cd va facela Sergio Rodríguez y calcúlase que'l discu tará na cai pa mediaos d'abril.