El futuru del turismu rural

El Reglamentu del Principáu que tien que marcar les condiciones en que se desenvuelva'l Turismu Rural nun dexa contentos a los más de los profesionales d'esta estaya importantísima nel desarrollu del sector turísticu nel país, y tampoco tien el preste de dellos grupos políticos. El testu iguáu pola Conseyería de Turismu recibió ayeri ba Xunta Xeneral del Principáu la crítica d'Izquierda Xunida. La coalición d'izquierdes entiende que se quier facer un modelu de Turismu Rural poco respetuosu col mediu ambiente, que nun respeta los principios básicos de desarrollu sostenible al nun contemplar cuestiones como la masificación o la vinculación al mediu rural en que s'enxerten estos negocios. Pa IX, el Principáu namás estudió el tema dende un puntu de vista mercantilista, cosa que s'espeyaría, por poner un casu, nos criterios pa 'alxudicación de "trisqueles" (equivalentes a les estrelles de los hoteles) que nun se darán al tenor de lo que se respete l'arquitectura tradicional o l'entornu, amás de afalar un aumentu descomanáu de places hoteleres. IX dixo que-yos abultaba qu'esti documentu taba redactáu falando namás que cola FADE, y polo tanto nun recueye los puntos de vista d'organizaciones de turismu rural que tienen muncho que dicir nesti tema.La Federación Asturiana de Turismu Rural yá se tien pronunciao sobre esti reglamentu y tamién sobre la política del Gobiernu asturianu nesta estaya. La crítica xeneral ye que se mira más pola apertura masiva d'establecimientos que por afitarr un control de calidá del serviciu, pero tamién hai aspectos concretos que nun presten un res. Por poner un casu, el presidente de l'Asociación d'Apartamentos Rurales (ARAS) Carlos Nava solliñó'l fechu de que la Llei nun obliga a los propietarios d'establecimientos rurales a residir, nin siquiera a empadronase, n el conceyu onde trabayen, colo que los que se beneficiaríen del negociu nun seríen los que-y dan vida al mediu en que s'enxerta.