El futuru del asturianu divide a los llectores d’Asturies.com

El ‘Conceyu Abiertu’ sobre’l futuru del asturianu presentó resultados mui asemeyaos en toles opciones. La más votada polos usuarios d’Asturies.com, con un 29 por cientu del total, ye que l’idioma, de siguir per esti camín, va desapaecer dafechu.

Sicasí, la mayor parte de les persones que votaron na nuesa encuestá sí-y ven a la llingua un futuru en dalgún de los trés escenarios que dibuxaron Alfredo Ignacio Álvarez Menéndez y los hermanos Ramón y Vital d’Andrés nun artículu espublizáu nun diariu de tirada nacional a últimos de payares y que los nuesos usuarios pudieron lleer n’Asturies.com. Asina, el 26 por cientu ye optimista cola posibilidá de que la llingua del país sía una llingua d’usu cotidianu, mentes qu’un 23 considera que va caltenese como un elementu simbólicu de la cultura asturiana y un 22 por cientu como parte del patrimoniu históricu d’Asturies, ensin un usu real.

Dende esti mesmu momentu, los llectores d’Asturies.com pueden participar nun ‘Conceyu Abiertu’ nuevu. Coincidiendo cola campaña entamada pola Xunta pola Defensa de la Llingua Asturiana entitulada “Regála(te) llibros y discos n’asturianu’ queremos conocer si los nuesos usuarios aprovechen estes fiestes pa mercar esti tipu de productos.