“El futuru de la oficialidá ta nes nuestres manes”, asegura la XDLA tres anunciar el proyeutu de reforma del Estatutu d'Autonomía

3.000 persones, según la organización, participaron nel Día de les Lletres Asturianes na manifestación  ‘L’asturianu llingua oficial. El futuru nes nueses manes’ que tuvo llugar esti vienres n’Uviéu. La XDLA aprovechó l’actu pa presentar el ‘Proyeutu 2018 pa la Oficialidá’ col que pretende abrir un procesu de reforma del Estatutu.

El tiempu al final respetó, y la marcha con salida de la Estación del Norte d’Uviéu y final nel Teatru Campoamor percorrío la cai Uría ensin agua y nun ambiente festivu. Xosé María García Sánchez 'Llábana' abrió, como ye vezu, la manifestación con un banderón d’Asturies, pa siguir depués los gaiteros y gaiteres de la Bandona pola Oficialidá y, tres d’ellos, la pancarta de la Xunta pola Defensa de la Llingua Asturiana (XDLA) col lema ‘L’asturianu llingua oficial yá!!’.

Partíos políticos, coleutivos y sindicatos sofitaron la marcha, llevando pancarta los neños y neñes de ‘Reciella. Families pol Asturianu’, los cargos públicos qu’apoyen la compaña ‘Conceyos pola Oficialidá’, un grupu de faltantes de gallego-asturiana col lema ‘¡Oficialidá xa!, Xente del Sur, SUATEA, Iniciativa pol Asturianu, La Curuxa, CSI, #LluchandoPolaSoberanía, Asturies Rebelde, Andecha Astur y Mocedá Comunista. Como punto final del actu, María Xosé Martínez, de la XDLA, encargóse de lleer el discursu a les puertes del Campoamor.

‘Proyeutu 2018 pa la Oficialidá’

El coleutivu cívicu aprovechó pa presentar en sociedá el ‘Proyeutu 2018 pa la Oficialidá’, que va poner en marcha tres algamar el compromisu de más de 12 diputaos de la Xunta Xeneral, el mínimu qu’esixe l’Artículu 56.1 p’abrir el procesu de reforma del Estatutu d’Autonomía, pa poder incorporar la oficialidá del asturianu y gallego-asturiano nel mesmu. “La sociedá y una parte importante de la xente que ta nes instituciones tiénenlo claro. Va un tiempín empezamos la campaña ‘Conceyos pola oficialidá”, que dio un resultáu perbonu y col que consiguimos que más de doscientes persones, ente alcaldes y conceyales, de 41 conceyos asturianos, ello ye, de más de la metá d'ellos, se posicionaren públicamente como partidarios de la oficialidá. Esto, de primeres, foi'l frutu del nuestru trabayu como asociación, pero tamién ye un síntoma de que toes tamos madurando como pueblu”, apuntó Martínez.

“Pa llevar alantre esti proyectu”, siguió, “vamos necesitar tola vuestra fuerza y pasión na defensa del idioma, la que venís demostrando dende décades. Y amás vamos necesitar el vuestru llabor, la vuestra ilusión y compromisu. El futuru de la oficialidá, del asturianu y del gallego-asturianu ta nes nuestres manes. El futuru mesmu, d’una Asturies habitable, vivible y xusta va depender de lo que síamos quien a lluchar”.