El fútbol asturianu fracasa nes eliminatories d'ascensu a Segunda B

Los cuatro conxuntos del país quedaron eliminaos. El Sporting B va tar nel sortéu de la segunda ronda por ser campeón de grupu.

El filial roxiblancu, l'Avilés, l'UP Langreo y el CD Tuilla nun foron quien a dar la vuelta a los marcadores adversos de los partíos d'ida y el fútbol asturianu queda colos xixoneses como únicos aspirantes a algamar el saltu a la Segunda División B. Namái los de José Alberto López y l'Unión tuvieron opciones reales de pasar de ronda, pero los goles nel tramu final del Olot y del Almería B, de manera respeutiva, supunxeron la eliminación de dambos.

Nun fixo mal partíu'l Sporting B énte un Olot con munchu oficiu que, ensin llevar el control del xuegu, sí creó ocasiones de gol. El tantu tempraneru de Claudio foi insuficiente, yá que nel minutu 77 un despiste defensivu permitió a Marc Mas rematar a placer un centru dende la derecha.

Esti gol ponía'l global en 2-1 pa los catalanes, que retornen asina a la categoría de bronce del fútbol estatal. Mentes, el Sporting B entra esta tarde nel sortéu de Las Rozas, onde va enfrentase a un cuartu o terceru, cola vuelta siempre en Mareo.

Dos empates y una derrota

Cerca de forciar la prórroga tuvo tamién l'Unión nel Estadio de los Juegos Mediterráneos. Los d'Hernán Pérez adelantáronse nel minutu 25 gracies a un chut espectacular de Pablo Acebal tres un saque un curtiu d'una falta dende la frontal del área, pero un bon gol tamién de Chema nel minutu 80 punxo fin al suañu llangreanu.

L'equipu que comenzaba la xornada col resultáu más favoratible foi l'Avilés, que sicasí perdió la eliminatoria por un global de 2-3. Un fallu defensivu llocal permitió a Adrián a adelantar al Cristo Atlético nel minutu 12, tantu que pesó muncho a los avilesinos, que namái pudieron maquillar el marcador con un tantu d'Álex Arias nel 82.

Tampoco dio la talla el Tiuya en Maspalomas, onde s'enfrentó al UD San Fernando. Pese a xugar con superioridá númerica mientres 55 minutos pola espulsión d'Israel, los canarios anotaron 3 tantos nel tramu final pa poner un global de 5-1 na eliminatoria.

Otra manera, nuna de les eliminatories d'ascensu a Primera Autonómica, el Rosal garró ventaya al vencer a la Piloñesa pol resultáu de 1-3.

Ensin quintu partíu

En baloncestu tampoco nun hebo bones noticies y l'Unión Financiera Baloncesto Oviedo cayó elimináu nes semifinales pol ascensu a l'ACB pol Quesos Cerrato Palencia por un global de 1-3. Los de Carles Marco viaxaron a Castilla cola intención de forciar el quintu partíu en Pumarín, pero dos derrotes por 81-70 y 86-71 dieron el pase a la final al equipu palentín, onde va vese a les cares con San Pablo Inmobilaria Burgos (0-3 al Cafés Candela Breogán).

Pese a esta derrota, el conxuntu uvieín robla una temporada espectacular, con títulu coperu incluyíu.