El funicular nun acaba nel tunel

Dempués de tol discutiniu qu'hubo cola tema del Funicular de Bulnes, entovía nun ta dicho too. Agora que'l tren yá ta funcionando, l'alministración quier desafacese d'elli y apaecen empreses privaes interesaes en xestionalu. Como nun podía ser d'otra maner tratándose d'Asturies, la empresa que más suena ye ALSA. El poderosu negociu familiar de José Cosmen tien un argumentu de pesu pa facese col polémicu tren énte otros candidatos que pudieren apaecer. Ello ye qu'ALSA esplota agora la única llinia d'autocar del llugar, que valdría de lanzadera pa xubir a los turistes dende Arenas hasta'l tren La llinia pertenecía primero a una pequeña empresa local, y nun llega hasta la boca'l tunel, pero ye la única que pasa per aquella parte.Otramiente, neto que cuando'l tren echó a andar esti veranu, dende l'alministración nun salen más que declaraciones contradictories sobre la tema. Anque dende'l Principáu diose anuncia de qu'había intención de subastar la xestión del funicular, tres el conceyu que tuvieron el Conseyeru d'Infraestructures y el portavoz del PSOE nel Conceyu de Cabrales, decidiose que nun va haber privatización hasta que se saque un plan xestor del llugar y acaben de cumplise dellos pidimientos de la xente de Bulnes.