El funicular a Bulnes va tar paráu del 18 de febreru al 1 de marzu

El funicular de Bulnes va parar del 18 de febreru al 1 de marzu. Mientres los trece díes nos que va tar interrumpíu'l serviciu van revisase los vagones y tolos sos elementos: frenos, suspensión, exes y ruedes y otres pieces y elementos menores.

L'actuación, que va requerir l'alzamientu de los vagones, va realizase na estación inferior. El direutor xeneral de Movilidá y Coneutividá, Jorge García, y el director de l'Axencia Asturiana de Tresportes y Movilidá, José Manuel Caldevilla, acompañaos del alcalde de Cabrales, José Sánchez, informaron el vienres a los vecinos de Bulnes de tolos detalles de la parada, cola mira de minimizar les molesties.

El serviciu de tresporte per cable yá suspendiera los sos viaxes los díes 12, 13 y 14 d'avientu p'acometer l'esame del grupu motriz y del reductor. Nesa ocasión desmontáronse tamién les pieces y repunxéronse los componentes que, pol so estáu, nun cumplíen coles tolerancies prescrites.

Na semeya, un momentu de la xunta colos vecinos de Bulnes.