El fotoperiodista Silveira recibió’l Premiu Ramón González na inauguración de ‘Miraes 2013'

El xixonés Muséu Barjola acueye dende esti martes la novena edición de la esposición billingüe ‘Miraes’, que va tar abierta al públicu hasta’l 16 de xunu. Na inauguración, José Ramón Silveira recibió’l Premiu Ramón González de Fotoperiodismu.

Una semeya del conflictu mineru tomada nos túneles d’El Padrún tomada por Silveira na que se pue ver a manifestante prendiendo fueu a una barricada, resultó escoyida pol xuráu del Premiu Ramón González de Fotoperiodismu 2013, conformáu por Matías Nieto (editor gráfico del diariu ABC), Ana Muller, Rafa Rivas (axencia France Press) y Matías Costa (premio Word Press Photo), como la meyor fotografía del añu n’Asturies. El profesional, trabayador de ‘La Nueva España de las Cuencas’, recibió ayeri entrega d’esti gallardón –una escultura del maliayu Pablo Maojo– de l’Asociación Profesional de Fotoperiodistas Asturianos (APFA) na inauguración de la esposición ‘Miraes’, qu’entama esti coleutivu en collaboración cola Conseyería d’Educación, Cultura y Deporte y el Conceyu de Xixón, y que recueye les meyores imáxenes del 2012 nel nuesu país. Arrodiáu de los sos colegues y atraviáu con una camiseta de sofitu a la minería, Silveira reclamó que la profesión “sía más reconocida” y recordó que “munchos compañeros tán agora en paru”.

Nel actu inaugural tamién tuvo presente, Fernando Robles, presidente d’APFA; el vicealcalde Rafael Felgueroso; y la conseyera Ana González Rodríguez. El primeru en tomar la pallabra foi Robles, que recordó “con allegría” que pasaron diez años “desque un grupu de fotoperiodistes diéremos el pasu pa formar un colectivu de profesionales y trabayar pol respetu d’una profesión sometida a crítica social y menospreciu llaboral”. Darréu, felicitó a Eloy Alonso, consideráu meyor fotogáfu del añu pol coleutivo estatal de informadores gráficos, y Manu Brabo, ganador del Pulizter por sus fotos de la guerra de Siria, pa depués pasar a reivindicar la profesión “nun momentu nel que se pervierte’l mensaxe”. “El fotoperiodismu tien nestos tiempos de crisis un papel importante. La imaxe demuestra lo que dalgunos nun quieren que se vea”, aseguró.

Pela so parte, Felgueroso quixo “dar fe del trabayu escelente” que faen los fotoperiodistes, a los que considera “compañeros” tres “dos años coincidiendo tolos díes”, en referencia al tiempu que lleva nel cargu. El conceyal de Seguridá Ciudadana allabó’l so “escelente trabayu, de gran calidá” y tamién tuvo pallabres pa Brabo y Alonso, al igual que González Rodríguez. La conseyera destacó la importancia de la profesión y señaló que les imaxes “suponen una escritura adicional al fechu; otra forma de velu”. “El mayor homenaxe que pue facer el Gobienu a esti coleutivu ye caltener el reconocimientu y el compromisu con ‘Miraes’, llevando la esposición a tolos rinconces de la nuesa xeografía”, añadió

Un resume del 2012 n’imáxes

Les persones que s’averen a la esposición ‘Mieres’ podrán ver un resume de tolo acontecío n’Asturies nel 2012 al traviés d’imaxes espectaculares. En total son 103 semeyes de 38 fotoperiodistes: Alejandro Zapico, Álex Piña, Alfredo Menéndez, Álvaro Fuente, Ángel Espina, Ángel Ricardo Pérez López, Armando Álvarez, Eloy Alonso, Fernando Geijo, Fernando Robles, Fernando Rodríguez, Irma Collin, Isabel B. Permuy, Iván Martínez, Javier G. Caso, Jesús Díaz, Joaquín Pañeda, José Luis Cereijido, José Ramón Silveira, José Simal, Juanjo Arias, Juan Menéndez, Juan Plaza, Juan Carlos Tuero, Luis Sevilla, Mara Villamuza, Marcos León, Marieta A. Sanjurjo, Mario Rojas, Miki López, Nel Acebal, Pablo Lorenzana, Pablo Nosti, Paco Paredes, Patricia Bregón, Purificación Citoula, Ricardo Solís y Sergio López.

La muestra, comisariada por Marcos León, va tar disponible al públicu xixonés nel Muséu Barjola hasta’l 16 de xunu. Llueu percorrerá toda Asturies pa que pueda ser disfrutada pol mayor númberu de xente posible. Hai que destacar qu'esta esposición ye billingüe, al tener tola información tanto n'asturianu como en castellanu.

Na semeya, Silveira interviene tres recibir el gallardón baxo la mirada atenta de González Rodríguez, León, Felgueroso y Robles.