El fondu d’inversión estauxunidense The Carlyle Group adquier el 85 por cientu de Telecable

The Carlyle Group llegó a un alcuerdu con Liberbank y Editorial Prensa Ibérica pa facese col 85 por cientu de Telecable. La sociedá británica de capital de riesgu CVC y ONO yeren tamién candidatos a mercar la empresa de telecomunicaciones.
 
El coste total de la operación, una de les mayores del añu nel Estáu, tien un valor de 400 millones d’euros y mantién a Liberbank, que poseía una participación del 91,89 por cientu na compañía, como aicionista con un 15 por cientu de la empresa Asina, la entidá financiera ingresó pola venta d’un 76,89 por cientu de los sos títulos más de 307 millones d’euros. Un voceru de Liberbank señaló que la operación cumple l’oxetivu del bancu llideráu por Caxastur al mesmu tiempu que “propicia incorporar al proyeutu de la compañía a un sociu de referencia internacional que-y permite cumplir el so potencial grande de desarrollu".
 
Mentes, el 'managing director' de The Carlyle Group y responsable d’esta inversión, Alex Wagenberg, destacó que l’adquisición de Telecable constitúi una operación grande pal fondu d’inversión, yá que "la compañía se comportó de manera esceicional nos años últimos y tienu un potencial grande a futuru". "La nuesa vocación ya dar tol sofitu al so equipu direutivu en collaboración con Liberbank, sociu clave pa garantizar el fuerte carauter asturianu de la compañía, que ye, ensin dulda, ún de los sos activos principales", añadió.
 
Tres esta operación, Telecable conviértese na cuarta compañía del Estáu participada por Carlyle, qu’anguaño cuenta con posiciones mayoritaries na compañía global d’inspeición, ensayos, certificación y control de calidá Applus+; nel grupu turísticu Orizonia, qu’integra marques como Viajes Iberia, Iberojet o Rumbo; y na empresa de servicios de ‘cloud computing’ y ‘hosting’ pa empreses y particulares, Arsys.