El folk esperimental protagoniza la cuarta sesión de Glayíos/Oihuak

Los vascos Gose y los asturianos Fabes de Mayo van actuar el vienres na sala uviedina La Calleja. Pa payares ta previsto un conciertu de fusión y reggae/hip hop.

El ciclu d’intercambios musicales ente los dos países entamáu por Ixuxú Asturies-Euskal Herria elkartea vive la so cuarta sesión, dedicada nesta ocasión al folk esperimental. En concreto, Glayíos/Oihuak presenta un cartelu con dos bandes con “propuestes orixinales, arriesgaes y bien interesantes”: la vasca Gose y la llocal Fabes de Mayo.

“Gose ye un tríu de Arrasate caracterizáu por frayar prexuicios a güelpe d’orixinalidá y provocación. La so base ye la trikitixa (curdión diatónicu), instrumentu qu’empobinen al campu la electrónica. El resultáu: ambientes cálidos, crudos, suaves… nunes composiciones que beben de la world music y de tola actitú punk. La so puesta n’escena ye la representación de tola tresgresión de les sos lletres, repartíes en cinco trabayos publicaos dende’l 2004”, apunten dende Glayíos/Ohiuak.

Mentes, Fabes de Mayo faen un folk máxicu instrumental. Nacida ente’l túnel d’Arnáu, les lloses maliayes y los praos de remolaches belgues, esta banda va armada con xilófonu, contrabaxu, curdión y ukeleles, recordando nes sos interpretaciones “al Yann Tiersen más ‘amelinescu’ o a la propia Penguin Café Orchestra”.

El preciu del conciertu, que va principiar a les 22 hores, ye de 5 euros anticipada –8 na puerta–, cola posibilidá de facese con dalgún de los trabayos de los dos grupos xunto cola entrada por 12 euros. Los puntos de venta son los siguientes: Café Paraíso y Mimaría, n’Uviéu; Sidrería Canteli y Centru Social La Llume, en Xixón; El Cafetón, n’Avilés; Judá, en Siero; Ochobre, en L’Entregu; y Matteria, en La Felguera.

El ciclu de conciertos ‘Glayíos/Oihuak. Música en Movimientu’ va completase en payares con una cita dedicada a la fusión y el reggae/hip hop.

Na semeya, Fabes de Mayo.