El folk de cámara vuelve al Muséu Xovellanos

Xuventúes Musicales de Xixón organiza nel Muséu Casa Natal de Xovellanos la segunda edición del ciclu "Folk de Cámara" que s'enxerta nel programa más ampliu de "Los Conciertos del muséu" que tien tamién una bona programación de música clásica.

Polo que-y toca al folk, la programación entama mañana vienres 21 d'ochobre col conciertu que van dar Lisardo Prieto (viglín y voz) y Ígor Medio (bouzouki y voz). Dempués de la sesión especial que van ufiertar los músicos de Felpeyu, el 28 d'ochobre: Elías García nel bouzouki, José Servando Menéndez "Pepín de Muñalén" na xiblata y la voz de Xose Antón Fernández "Ambás" o lo que ye lo mesmo "Tuenda" van poner la seguda cita d'esti ciclu que va rematar el 4 de payares cola actuación de Gema García (voz), Blanca Sáenz de Miera (vigulín) y Fernando Oyágüez (bouzouki). Tolos conciertos van ser nel Muséu Casa Natal de Xovellanos (Cimavilla) a les 7 y media de la tarde con entrada llibre hasta enllenar la sala. El ciclu, que yá se celebrare nel añu 2003, ye una iniciativa de l'asociación Juventudes Musicales, que quier col festival "ufiertar música tradicional asturiana nun formatu asemeyáu al de la música de cámara, ello ye, conxuntos pequeños de dúos, tríos o cuartetos en sales recoyíes y ensin amplificación".

N'acabando'l ciclu de folk, siguen los conciertos en muséu con un programa de música clásica qu'entama'l 18 de payares col Cuartetu de Cuerda Astur, el 25 con Francisco Cantó (clarinete) y Isolda Crespí (piano). El 2 d'avientu, cuartetu de Guitarres "Terpsícore" y el 9, pa echar el piesllu, "L.O.M. Piano Trío".