El fiscal pide diez años de prisión pa Otegi y otros dirixentes

La Fiscalía de l'Audiencia Nacional pidió diez años de prisión pal ex voceru de Batasuna Arnaldo Otegi, l'ex secretariu xeneral del sindicatu LAB Rafael Díez Usabiaga y otros seis dirixentes de la izquierda abertzale.

L’acusación ye reconstruyir Batasuna, al traviés del proyectu 'Bateragune' (Toos Xuntos), qu'actuaba como "órganu de construcción del polu soberanista baxo'l control d'ETA".
 
L'escritu provisional d'acusación, presentáu ante la Estaya Cuarta de la Sala de lo Penal, imputa a los ocho acusaos un delitu d'integración n'organización terrorista por promover una “alianza independentista" que tenía por finalidá "llamar a la incorporación de formaciones polítiques como EA, Aralar o AB al espaciu de llucha na confrontación ente Euskal Herria y l'Estáu".
  
Amás d'Otegi y Díez Usabiaga, van sentase nel banquín de los acusaos Arkaitz Rodríguez, Miren Zabaleta, Sonia Jacinto, Amaia Esnal, José Luis Moreno y José Manuel Serra. Toos ellos resultaron deteníos el 13 d'ochobre del 2009 na sede de LAB en San Sebastián.