El fiscal pide 8400 euros de multa por pintar los topónimos n’asturianu nun cartel de carretera

Xose Antón Cadierno, miembru de la organización "Xunta Pola Defensa de la Llingua asturiana" enfréntase a una posible multa de 8483'94 euros o un añu de privación de llibertá, que ye lo que pide'l fiscal nel xuiciu nel que se procesa al militante asturianista por escribir con pintura'l topónimu tradicional nun rótulu de carretera que conseñaba la forma en castellanu del topónimu.

La Xunta Pola Defensa de la Llingua asturiana califica la pitición del fiscal como "escandalosamente desproporcionada y basada nuna interpretación claramente tendenciosa del Códigu Penal, que fae rescamplar la so intencionalidá política en contra de la reivindicación llingüística".

La organización Xunta pola Defensa de la Llingua Asturiana anunció que va ufrir al compañeru Xosé Ántón tol apoyu y solidaridá que fagan falta pa sacar alantre esti procesu y denuncia "la dureza implacable cola que la fiscalía actúa contra un ciudadanu por correxir un rótulu de carretera que yá taría na forma correcta si les alministraciones respetasen la llei" y "la situación d'indefensión xenerada pola so dexadez y complicidá énte l'incumplimientu de la llegalidá por parte de les alministraciones" ello en cuantes que la Llei d'Usu y Promoción del Asturianu recueye que "Los topónimos de la Comunidá Autónoma del Principáu d'Asturies han tener el so nome oficial na so forma tradicional". La organización afirma que "dende l'aprobación de la llei va más de nueve años, los sucesivos gobiernos asturianos incumplen y vulneren sistemáticamente'l conteníu d'esti artículu imponiendo allegalmente pola vía de los fechos una toponimia falsa, castellanizada y deformada col únicu oxetivu de facer desapaecer la llingua asturiana de los nomes propios de los nuesos llugares".