El final del branu lleva a un aumentu del paru de 2.269 persones

|
Camareru paru

Asturies finó’l mes de setiembre, l’últimu del periodu vacacional, con un total de 70.562 paraos tres sumar 2.269 en comparanza con agostu. No que respeuta a los datos interañales, el país enllaza 60 meses siguíos de descensu, rexitrando una mengua del 7,24.

Según los datos del rexistru del Serviciu Públicu d’Emplegu Estatal, el paru aumentó un 3,32 por cientu, con ascensos en dambos sexos y en tolos grupos d’edá. L’únicu sector nel que crece’l trabayu ye la construcción, con una variación positiva del 1,60 por cientu.

La media estatal ye del 0,64 por cientu, siendo los territorios con peores datos Illes Balears (5,49 por cientu), Cantabria (4,88) y Extremadura (3,69). Consiguen menguar les llistes del paru La Rioja (5,76 por cientu), Castilla-La Mancha (3,03) y Ceuta (1,20), ente otros.

No que se refier a los datos interañales, Asturies rexistra 5.509 paraos menos, esto ye, un descensu del 7,24 por cientu, superior a la media estatal, que s’asitia nun 6,09 por cientu. Tolos territorios ameyoren datos con respeuto al añu pasáu, con Galicia (9,64 por cientu) y Castilla y Lleón (9,14) lliderando la tabla y Melilla (2,52) y Ceuta (3,72), zarrándola.

Otra manera, el númberu d’afiliaos a la Seguridá Social asitióse en 363.675 persones, lo qu’implica un descensu del 1,47 por cientu respeuto al mes anterior. La variación interañal amuesa un incrementu de 3.533, concretamente un 0,98 por cientu perriba de les cifres del 2017.

AdxuntuTamañu
PDF icon Datos del paru setiembre 20181.73 MB
Contador Estadistiques