El FICXixón 2010 llega con novedaes na so 48 edición

El director del Festival Internacional de Cine de Xixón, José Luis Cienfuegos, prometió esti xueves en Xixón una 48 edición "estimulante y retadora" con presencia de cineastas españoles y na que s'estrechen llazos con Llatinoamérica.

Una edición, del 19 al 27 de payares, na que va haber una destacada presencia del cine alemán y va facese repasu a la filmografía de los directores Eugène Green, Kim Longinotto y Reynold Reynolds, amás d'entrar nuna reflexón sobre la construcción d'Europa.
  
Cienfuegos, que reconoció que la falta de presupuestu lleva a recortar un día de programación, resaltó la presencia de trés directores españoles na Sección Oficial, "bien distintes y personales, pero qu'amás se complementen ente ellos". "Una de les deudes yera nun tener tanto cine español como mos prestaba", señaló na meyora de programación na Casa de la Palmera.
  
En concreto, Jonás Trueba va traer al festival 'Todas las canciones hablan de mí', protagonizada por Eloy Azorín y Valeria Alonso, mientres que Manuel Martín Cuenca convídamos a descubrir 'La mitad de Óscar', acabante estrenar nel Festival de Cine de Toronto, ún de los más importantes ente los grandes mercaos cinematográficos, según Cienfuegos.
  
A lo último, Oliver Laxe va presentar la so ópera prima 'Toos vós sodes capitáns', cola que debuta nel llargumetraxe. Tamién va haber cine español na sección Rellumes, na que se va proyectar 'La vida sublime', de Daniel Vázquez Villamediana, guionista de La Línea Recta y que debutó con 'El brau blau'.

Un cine fráxil  
Cienfuegos llamentó que'l cine qu'ufierta esti festival ye "bien fráxil" y que cada vez tien más barreres pa llegar al públicu. Tamién destacó'l retu que suponen les Nueves Tecnoloxíes y añadió que nel 2009 ofreciéronse 30 de les películes en HD, cine dixital. Son precisamente estes Nueves Tecnoloxíes les qu'ayuden, según él, a que'l cine español seya "bastante más llibre".
  
El director del festival mostróse a favor de ser "bien rigorosos" na calidá de los visionados. Amás, indicó que la programación ta prácticamente zarrada y adelantó que la sección 'Rellumes' "va ser una sorpresa".

Llatinoamérica y Alemaña
No referente a 'Puentes 2010’, trátase d'un alcuentru de productores europeos y llatinoamericanos, que s'enmarca nun programa desarrolláu pol European Audiovisual Entrepeneurs (EAVE). Gracies a él, van desarrollase diez proyectos européu-llatinoamericanos. Coles mesmes, pa él celebrarán dos talleres, ún que yá tuvo llugar en Buenos Aires, y que va tener llugar en Xixón, del 23 al 26 de payares.
  
Los diez productores participantes -cuatro europeos y seis llatinoamericanos-- van contar cola ayuda d'espertos dende Peter Rommel, Hernán Musaluppi a Roberto Olla. Tamién nesti seminariu hai presencia española, cola participación de Fernanda del Río, que va tar acompañada de la uruguaya Agustina Chiarino o René Bastián, ente otros.

Al respecto de la Escuela de Berlín, va dase a conocer una xeneración de mozos directores alemanes que muestren un cine sobriu, realista y sin concesiones, ente los que tán Christian Petzold ('Yella'), Angela Schanelec ('Orly), Thomas Arslan ('Im Schatten'), Valeska Grisebach, Ulrich Köhler ('Bungalow') o Maren Ade. Caún d'ellos reivindica la so propia identidá al traviés d'un cine de baxu presupuestu, nel que s'adientren nes preocupaciones vitales.

Temes sociales  
FICXixón, amás, va convidar al espectador a analizar la idea del espaciu européu y el llamáu Estáu del Bienestar al traviés d'una programación que se centra n'aspectos tovía non resueltos, como los nacionalismos o la inmigración.
  
'L'Esquive', d'Abdel Kechiche, 'La bocca del lupo', de Pietro Marcello, 'Flickan' de Fredrik Edfeldt o 'Worlds Apart' de Niels Amburen Oplev son algunes de les películes que podrán vese nesta compilación de títulos de países como Suecia, Alemaña, Estonia, Bulgaria, Grecia y Italia.

Vuelve al Xovellanos
Al par de Cienfuegos intervino'l conceyal de Festexos, José Manuel Sariego que resaltó que'l de Xixón fízose un güecu destacáu nel circuitu de festivales pola so apuesta pola calidá y un cine nuevu, que va dirixíu a un públicu heteroxéneu.
  
Sariego aseguró que Xixón ye un referente y una cita imprescindible pa los amantes del cine. Calcó en qu'hai diez años pasaron pel festival 35.400 espectadores, mientres que nel 2009 fueron 74.400, pese a que'l teatru Jovellanos tuvo peslláu poles obres de reforma.
  
Sobre esti tema, indicó que'l festival va volver al Jovellanos, anque se caltienen nel teatru de la Llaboral les gales d'inauguración y clausura, asina como la estaya 'Enfant Terribles'. Amás, va haber proyecciones nos Cines Centro, el Centru Municipal Pumarín Xixón-Sur y el Centru de Cultura Antiguu Institutu.