El Festival Sacavera Sound trai poesía, arte, folixa y psicodelia a La Pola Siero

El Llar El Mataderu va ser sede esta fin de selmana del Festival Sacavera Sound. Esti certame de poesía contemporáneo pretende axuntar distintes propuestes artístiques que se tan dando n’Asturies, con espaciu tamién pa la música y les perfomances.

L’actividá va principiar a les 18.30 hores d’esta tarde con un taller de fancín collaborativu que va correr a cargu de Casa Miguel. Pa les 21 hores ta prevista la primer Gran Verbena Poética, cola música de Colmena y la participación de Los Nadie Cantabria, el Comando Esbardalle Galicia (IV Centuria), David Suárez ‘Suarón’, Carol Bret y Laura Marcos. A la medianueche va tener llugar un ‘afterparty’ con Los Hermanitos y DJ Pedro Menchaca nel Diañu Rock-Bar, asitiáu na plaza Les Campes.

L’actividá de mañana va abrila a les 19 hores un alderique de nome ‘Ruptura y continuidá na nueva lliteratura asturiana’, moderada por Miguel Rodríguez Monteavaro, na que tienen confirmada la so asistencia Antón García, Alba González Sanz y Xuan Santori. Darréu, a les 21 hores, va ser el turnu de la segunda Gran Verbena Poética, nesta ocasión con Patarrealismo Salvaje, La Poesía del Coño, Tapir Life Show, Comando Esbardalle Galicia (V Centuria), Yunclas y el Eterno, y Sergio S. Taboada. Nesta xornada, la folixa posterior va pasar al Judá, tamién en Les Campes, con Fabes de Mayo y DJ Abysal.

Pa zarrar el Sacavera Sound, el domingu al meudía va tener llugar en Les Campes un pieslle poéticu y un “vermú molón”. Toles actividaes d’esti certame son de baldre y abiertes a tol públicu.