El festival Sacavera Sound torna a ximelgar La Pola Siero

Poesía, arte, música, folixa y psicodelia axúntense esta fin de selmana na villa.

Tres la bona esperiencia del añu pasáu, el festival Sacavera Sound algama la so segunda edición, otra vegada col Llar El Mataderu como centru d'operaciones y con actividaes tamién repartíes pel Diañu, el Judá y otros puntos de La Pola Siero. Trés díes nos que la folixa y la cultura danse la mano.

L'actividá va principiar mañana a les 20 hores nel Llar El Mataderu cola Primer Gran Verbena Poétika, con Keimada Poétika d'apertura, amenizada por Esbardalle Galicia, As Nebrosas, Sofía Castañón, David Suárez 'Suarón' y Ola Cantábrica. Darréu, a les 23 hores, va celebrase una afterverbena nel Diañu con Severina y sus Muyayos y Nochnepiche Esbilla.

El sábadu va entamase el Gran Pasacaleyes Poeticopsicódelu pelos praos de la contorna de La Pola, una marcha que va tener salida a les 18 hores de Les Campes. A les 21 hores, mentes, El Llar El Mataderu va acoyer la Segunda Gran Verbena Poétika, cola participación de Toli Morilla y David González, Mapu y Ricky Roga, Andrea Wolf y el Tapicorniu, Gsus Bonilla, Ana Perez Cañamares y Timba Poétika Classics. Les Barbares Barbus van zarrar la xornada con un conciertu nel Judá a les 23.30 hores.

La xornada cabera, el domingu, l'actividá va principiar a les 13 hores na terraza del Llar El Mataderu, con una xinta popular y una romería techno "hasta l'atapecer" que va poner el ramu a esti festival.