El Festival Internacional de la Gaita llega a la so sétima edición

Dende’l xueves al domingu, Villaviciosa va acoyer la sétima edición del Festival Internacional de la Gaita (FIG). La III Nueche de la Gaita, el Festival de Bandes de Gaites y les dos nueches celtes son les actividaes principales d’esti certame.

El FIG va incluyir na so programación más de 20 actuaciones musicales ente bandes de gaites y grupos de música que van tocar dende música tradicional hasta'l rock con esti instrumentu, amás d'un mercáu tradicional y una carpa con demostraciones de 'luthiers'. L’espectáculu de lluces y soníu 'Nueche de la Gaita' va abrir el festival a partir de les 22.30 hores nel escenariu de L’Anchu. Ésti va consistir nun repasu, al traviés d’actuaciones diverses, a les delles versiones musicales d'esti instrumentu, dende la más tradicional a la más moderna. Los gaiteros que van participar nesti eventu son Nico Radin (Breizh biniou, bretona), Jose Manuel Pérez (gaita galega), José Manuel Tejedor (gaita asturiana) y Dani Álvarez (Uilleann pipe, irlandesa), a los qu’hai que sumar la banda asturbretona Latira y, a lo último, la Banda Gaites Villaviciosa-El Gaiteru, que va ufrir un conciertu acompañáu de dellos instrumentos: guitarra llétrica, flauta y bouzouki, ente otros elementos. Tres el conciertu, la folixa va continuar nel Café Teatru El Grillu Salvaje con una sesión folk.

Mañana ta prevista l’apertura, a les 18 hores, del Mercáu Tradicional compuestu por 62 puestos y asitiáu nel Parque d'El Pelambre y la celebración de la primer nueche celta, que va principiar a les 22.30 hores nel escenariu central del FIG. Latira, los lleoneses Aira da Pedra, Tuenda y Skama la Rede van animar esta segunda xornada del certame hasta bien entrada la madrugada. Mentes, el sábadu, va celebrase’l Festival de Bandes de Gaites, nel que van participar la Banda de Gaites Candás, la Banda de Gaites Xácara, la Banda de Gaitas Castro Bergidum (El Bierzu), la Banda de Gaitas Ciudad de Cangas de Onis, la Bandina de la Escuela de Musica Tradicional y Banda de Gaites Villaviciosa-El Gaitero. Éstes van facer un pasucais a les 20 hores pa, media hora depués, actuar nel escenariu central, el mesmu nel que los cántabros Naheba y Tejedor van protagonizar la segunda nueche celta a medianueche.

El día caberu, el domingu, va celebrase'l Concursu de Gaiteros Solistes ‘Memorial José Huerta’ (19 hores), y de nueche una actuación del músicu Héctor Braga (23.30 hores). Hai que destacar que de forma paralela al FIG, dellos establecimientos hosteleros van acoyer actuaciones nes que van tomar parte los músicos participantes na programación del certame entamáu pola Banda Gaites Villaviciosa-El Gaiteru.