El Festival Internacional de Bandes de Gaites Villa de Xixón recupera la Folixa Intercéltica

Va celebrase'l sábadu nel Muséu del Pueblu d'Asturies y va contar con conciertos de 6 Riales y Deira, actuaciones de formaciones de Galicia y Catalunya, y un taller de baille.

La Folixa Intercéltica torna al XXII Festival Internacional de Bandes de Gaites Villa de Xixón depués del parón obligáu pola pandemia. Va pasar al sábadu, con entamu al meudía y accesu llibre.

Les bandes gallega Agarimo de Catabois y catalana Sons de la Cossetània va animar tola xornada, mentes qu'a les 17 hores ta previstu un taller de baille con Pau Santirso. Va completar el programa los conciertos de 6 Riales (20 hores) y del tríu asturandaluz Deira (22 hores).

El grupu folk Burbús va abrir a les 20 hores d'esta tarde esta edición na plaza de La República con un conciertu nel que va presentar un repertoriu que xunta tradición y creación nueva. Mañana l’actividá va treslladase a la Plaza’l Marqués, onde a la mesma hora va tocar la formación inglesa de tradición escocesa Cambridgeshire Caledonian Pipe Band.

El vienres xixoneses y visitantes van poder disfrutar de la presencia de toles bandes participantes convidaes nesta edición del festival, tamién a les 20 hores, colos irlandeses North Coast Dance Company nel paséu de Begoña, Agarimo de Catabois na plaza Italia, Sons de la Cossetània nos Xardinos de la Reina, y los escoceses nel Paséu de Begoña.

Día d'Asturies y gala

El Día d'Asturies y l'entamu de la Selmana Grande, cola llectura del pregón por Maxi Rodríguez, van xunise'l domingu a esti certame. A les 12 toles bandes, a esceición de la irlandesa, va desfilar nel per El Muro xunto cola organizadora Banda de Gaites Villa de Xixón.

La gran gala de la Plaza Mayor ta prevista pa les 21 hores y enantes, a les 20, va haber un pasucais dende los Xardinos de la Reina p’animar al públicu a presenciar l’eventu final d’un festival qu’esti añu recupera la normalidá.