El Festival Intercéltico d’Occidente toma Tapia

|
Cartelu del XXI Festival Intercéltico d'Occidente

Tapia conviértese per estos díes nun centru de referencia de la cultura celta. Comienza esti miércoles el XXI Festival Intercéltico d’Occidente (FID’O), qu’hasta’l llunes programa delles actividaes, con especial protagonismu pa la música.

Depués del cambiu de fecha del añu pasáu, edición del venti aniversariu, col adelantu del aniciu una selmana buscando acceder a artistes de mayor nivel, la Banda de Gaitas Occidente decide apostar nesta ocasión pol mesmu criteriu. Asina, esta tarde, a les 19.30 hores va tener llugar la inauguración y izáu de la bandera celta na plaza del Ayuntamientu cola presencia del alcalde, Enrique Fernández Castelao; la conceyala de Cultura, Dulce Martínez; y el direutor del festival, Martín F. Cascudo.

Un total de doce formaciones procedentes d’Asturies, Galicia, Éire, Breizh, Aragón, Andalucía, Xapón y Inglaterra van llevar les sos músiques y dances a Tapia estos próximos díes. Los primeros n’actuar son los aragoneses El Mantel de Noa, a les 23 hores d’esta nueche nel Auditorio.

Mañana va tener llugar una verbena tradicional nel puertu a les 23.30 hores con El Koku la Manzada –qu’enantes, a les 21.30 hores, va participar nun jam session xunto con Ayalga nel parque–, mentes que’l vienres a la mesma hora va celebrase una Noite Folk de nidiu calter irlandés na playa del Murallón con Dominic Graham School of Irish Dance y Cúig. La siempre esperada Gran Noite Máxica, eventu central del FID’O, lleva’l nome de ‘El lamento de la madre tierra’, con guión de Sara López Peláez, que va representar el grupu de teatru Aires Costumbristas d’A Caridá. El so comienzu va ser a les 23.30 hores, tamién nel Murallón.

Una hora enantes, a les 22.30 hores, va empezar el domingu’l conciertu caberu d’esta edición, cita na que van actuar los xaponeses Harmonica Creams y los andaluces Rare Folk.

Mercáu Celta y homenaxe a los marineros

Amás de lo musical, cola presencia tamién pa dar animación de la Banda Gaites Villa de Mieres,  los gallegos Banda de Gaitas Airiños do Castelo y Grupo de Danza Santa Eulalia de Mos, los bretones Bagad Karaez y Cercle Celtique de Rostrenen, y los ingleses Pipes & Drums London Clan Gathering, va haber delles actividaes, ente los que destaca’l Mercáu Celta. Ésti va tar activu dende les 19.45 hores d’esta tarde, con un horariu habitual de 11 a 22 hores.

A les 20 hores va inaugurase el taller-esposición ‘El Bandoneón en Asturias’, del luthier Nicolás Córdoba, que va tar abiertu hasta’l domingu de 11.30 a 13.30 y de 19 a 21.30 hores. El vienres, al meudía, va tener llugar l’homenaxe a los marineros nel mirador d’Os Cañóis y el domingu, a les 11.30 hores, l’alborada al mar, con salida de la punta del muelle.

L’Intercéltico va clausurase finalmente'l llunes col arriáu de la bandera celta.

Contador Estadistiques