El Festival de Cultura Urbano de Samartín nun va celebrase esti añu

La situación pola pandemia de COVID-19 obliga a suspender la cuarta edición del certame, previstu pal mes de xunu.

L'Asociación Xuvenil Que Nun Apare! confirmó ayeri l'anulación del Festival de Cultura Urbano de Samartín, dexando abierta la posibilidá de facer un eventu más pequeñu depués de branu. "Estes selmanes d'estáu d'alarma, confinamientu y parón (y lo que queda) faen un flacu favor pa la preparación, ellaboración, desendolcu y financiación" del eventu, a lo qu'hai que sumar la "incertidume imperante", esliquen dende esti coleutivu.

Lo que sí ye seguro ye que'l certame va tornar "en Xunu de 2021" colo previsto pa esti añu en L'Entregu y "más artistes, más actividaes y más ganes". Que Nun Apare!, que comunica que les rifes pa la financiación del festival se caltienen, aprovecha la situación pa "reconocer el llabor cultural necesariu que desendolquen les artistes y teúnicos de soníu nes nueses vides" y pa pidir "que dende les alministraciones se-yos compense pola imposibilidá de poder trabayar nestos dificiles tiempos".