El Festival de Cine Asturianu entregó lo sos premios en Madrid

‘Puntu’, d’Eva Gallego, foi’l ganador na categoría de Meyor Curtiumetraxe n’Asturianu nel VII Festival de Cine Asturianu que se celebró esti llunes en Madrid. El guionista xixonés Carlos Blanco Hernández recibió un homenaxe.
 
El Premiu al Meyor Actor foi pa Jesús Pardo, por ‘Días perdidos’, mentes que’l de meyor actriz llevólu Almudena Gallego, por ‘Anorexia’. El galardón al Meyor Curtiometraxe en Castellanu foi pa ‘Días perdidos’, de Senén Fernández, y el de Meyor Película, pa ‘El horror de la dama del lago’, del avilesín Diego Vázquez. Por último, la productora Hi-Vidio recibió’l Premiu al Meyor Documental por ‘Concejo de Tineo, naturaleza a la carta’.
 
El xuráu d’esta edición de los premios del Festival tuvo formáu polos realizadores Teresa Marcos, Iñaki Ibisate y Ángeles Muñiz, premiaos y participantes n'años anteriores. Encargáronse d’entregar los premios el direutor Gil Parrondo y el guionista y cineasta Florentino Soria. Amás, el Festival fixo un homenaxe al guionista xixonés Carlos Blanco Hernández, responsable de los guiones de ‘Cuando llegue la noche’, película rodada nel añu 1946 basada na obra de teatru homónima de Joaquín Calvo Sotelo; ‘La princesa de los Ursinos’ (1947); ‘Las aguas bajan negras’ (1948), de temática asturiana; y ‘Los peces colorados’ (1955), ente otros munchos trabayos que, inclusive, abrieron-y la puerta de la industria norteamericana.
 
Raimundo García, María Casal, Lola López, Javier Longas, Rocío García, Miguel Losada y Alfonso Suárez foron dalgunos de los asistentes a la gala del VII Festival de Cine Asturianu celebráu nel Atenéu de Madrid, que tamién acoyó la presentación na capital castellana del llibru ‘Historia del cine asturianu’, de Xaviel Vilareyo y Villamil.