El festival ayerán ‘Tocando pelos pueblos’ va tener representación asturiana, charra y vasca

El Cine Carmen de Morea va acoyer esti sábadu la XVI Muestra de Música Tradicional ‘Tocando pelos pueblos’. Los asturianos A Rabil, los charros Txebe y Patri, y los vascos Zaldibiako Trikitrixa participen nesta edición del certame.

La Sociedá Humanitarios de Samartín ye la entidá qu’entama esti festival que nació hai quince años cola intención de facer una muestra de música tradicional con un enfoque distintu a les nueches celtes qu’entamaben a surdir naquella época: facer daqué más cercanu al públicu, más personal. Asina llegó la primer edición, na que participaron Siyka Katzeva, Jacques Matres, Olivier Pigeassou, Gordon Duncan, la Banda Gaites La Viga Travesá y Fonsu Fernández y Xuan Nel Expósito. Naquellos años, la ilesia parroquial yera’l llugar más afayadizu pa la celebración de la muestra pol so aforu y acústica, pero nel 2002 la organización pasó’l certame al Cine Carmen.

Les persones que s’averen al auditoriu ayerán el sábadu (20 hores), con entrada llibre, van poder sentir la música de los xixoneses A Rabil, grupu formáu por dellos alumnos de gaita rabil de la Escuela de Música Tradicional La Quintana, dirixíos por Merce Santos, que, ensin dexar de llau la música tradicional del país, pretende dar al instrumentu un aire renováu y universal, interpretando melodíes de delles zones del mundu, asina como versiones. Los componentes d’A Rabil son Canor Fernández, Fernando Huerta, José Arboleya, Fran Lago y Merce Santos.

Tamién van participar en ‘Tocando pelos pueblos’ Txebe y Patri, duu que pese a nun nacer en Salamanca –él ye de Madid y ella, de Donosti–, viven en Peñaparda, siéntense enforma charros y toquen música de la zona, y Zaldibiako Trikitrixa (José Luis Etxeberria ‘Xapre’ y Josean), formación clásica vasca de trikitrixa y pandereta con 30 años de trayeutoria pese a nun tener nin un discu editáu nin anunciase pela rede. Hai que destacar que la ellaboración del cartelu d’esti añu correspondió al rioseyanu, residente en Xixón, Emilio Buergo Martínez.