El Festival Arcu Atlánticu va averar Xixón a Nantes

El Conceyal de Cultura, Carlos Rubiera, presentó ayeri la segunda edición del Festival Arcu Atlánticu, en compañía de representantes de los conceyos de Carreño, Ribeseya, Siero, Valdés y Villaviciosa. El Festival va tener llugar dende'l 26 de xunetu hasta'l 4 d'agostu.

Un nexu d'unión, una plataforma d'intercambiu, un gran festival cultural, lúdicu y gastronómicu que celebra l'averamientu ente pueblos xuníos pela mar como elementu común. La nueva edición del Festival Arcu Atlánticu presentóse ayeri nel Conceyu de Xixón, y per primer vegada va cuntar cola participación d'otros conceyos asturianos, escoyíos por criteriu xeográficu y pol so venceyu cola mar. Carreño, Siero, Valdés y Villaviciosa van tener los sos propios stands nel festival, nos que se van celebrar diverses actividaes.

Colos oxetivos de sirvir d'escaparate tantu como pa Xixón como para Asturies, amás de reforzar vínculos históricos culturales y comerciales con ciudaes y países de la fachada atlántica europea, el Festival va enmarcase dientro del Branu Cultural Atlánticu”, y preséntase con delles novedaes. Los espacios concentraránse esta vegada en redol al Puertu Deportivu dende los Xardinos de la Reina hasta la punta de Lequerique, Plaza Mayor, Campu Valdés y el Centru de Cultura Antiguu Institutu. Nesta ocasión va acoyer un Salón Agroalimentariu, una esposición de productos de calidá  venceyaos a la tierra, abierta al públicu y tamién empobinada al intercambiu comercial, que va cuntar con un total de 10 distribuidores europeos. Amás va celebrase una amuesa d'artesanía na zona de Tomás y Valiente y Parchís, en collaboración col Sindicatu d'Artesanos d'Asturies.

Por cuenta de la estrecha collaboración cola ciudá de Nantes, ciudá convidada nesta edición, l'escritor Jules Verne va tener una presencia destacada al traviés de les Xornaes Lliteraries entamaes pola Asociación Cultural L’Arribada. La música va siguir teniendo protagonismu coles actuaciones de Taranus, Jane Joyd, Asturiana Minnig Company o Liam Ó Maonlaí ente otros.

La gala d'inauguración va ser el día 26 nel Teatru Xovellanos, col estrenu de la Obertura Columnes d'Hércules d'Eduardo García Salueña. Aprovechando l'actu de presentación, Carlos Rubiera adelantró la futura participación de Nava y Cangues d'Onís, que se van sumar a la edición del añu que vien.