El Festival Arcu Atlánticu abre’l certame a cinco conceyos “pa ser l’escaparate de toda Asturies”

Valdés, Villaviciosa, Siero, Carreño y Ribeseya van participar nel Festival Arcu Atlánticu con una programación especial. L’oxetivu d’esta apertura al restu del país ye convertir el certame nel “escaparate de toda Asturies”, afirma Carlos Rubiera.

Los trés conceyos que faen llende con Xixón, xunto con dos de los más representativos del oriente y del occidente, incorpórense d’esta manera a la segunda edición del Festival Arcu Atlánticu, certame impulsáu por Rubiera qu’espera crecer esti añu abriéndose a tol país. “Tien tolo lo que los asturianos podemos ufrir”, destacó l’edil d’Educación, Cultura, Mocedá y Fiestes, que na so intervención utilizó’l castellanu, al igual que’l restu de representantes de los ayuntamientos participantes que, ún a ún, esgranaron la programación que tienen preparada pa los díes del festival, que va celebrase ente’l 26 de xunetu y el 4 d’agostu.

El primeru en tomar la pallabra foi José Modesto Vallejo, alcalde de Valdés, conceyu qu’apuesta fuerte na so collaboración col festival. Asina, el ‘Bus Arcu Atlánticu’ va llevar el sábadu 3 d’agostu a toles persones interesaes –les inscripciones han de facese en ‘InfoXixón’– al Festival Vaqueiro que tien llugar na braña d’Aristébano y a visitar les instalaciones del CEPESMA o’l prau de La Regalina, ente otros llugares del municipiu. Tamién va entamar una bona cantidá d’actividaes, tanto en territoriu valdesanu como en Xixón. Éstes últimes, centraes el 2 d’agostu nel Día de Valdés, detallóles Daniel González Suárez, conceyal d’Urbanismu, Infraestructures, Vivienda, Cultura y Deportes.

Juan Ramón González González, edil de Cultura y Turismu de Villaviciosa, destacó l’apuesta pola promoción de la mazana, l’acebache, la gastronomía y el románicu y el prerrománicu que va facer el so conceyu nel stand turísticu que va instalar, al igual que’l restu de municipios, en Xixón. Mentes,  Siero va centrase nel so patrimoniu industrial y románicu, les sendes y los eventos culturales, recreativos y deportivos, según señaló María José Sánchez Alonso, conceyala de Cultura, Educación y Igualdá de Siero, que confirmó que nun va haber ‘Bus Arcu Atlánticu’ hacia territoriu sierense pa  non discriminar nenguna de les folixes qu’hai neses feches nel llugar. Dambos conceyos, que van celebrar los sos díes el 1 d’agostu –el bus saldrá’l día siguiente– y el 31 de xunetu, de manera respeutiva, van llevar a Xixón tamién representación de los sos grupos folclóricos y de los dos sos meyores embaxadores: la Banda de Gaites Villaviciosa-El Gaitero y Los Sidros y La Comedia de Valdesoto. Al respeuto, la mazcarada asturiana va desfilar a lo llargo del certame tanto per Xixón como pel restu de conceyos.

Nava y Cangues d’Onís, pal añu qu’entra

Carreño, pela so parte, quier enfocar la so participación nel certame naquellos aspeutos “que xunen el conceyu col restu de pueblos del arcu atlánticu”, según esplicó Ana Eva Rodríguez, téunica de Turismu del municipiu. Asina, el stand turísticu va promocionar la necrópolis tumular del Monte Areo y la industria conservera al traviés de la esposición permanente qu’acueye Candás “pa que la xente nun s’escaeza del pasáu conserveru” de la villa. Estos dos llugares van ser paraes del ‘Bus Arcu Atlánticu’ que va salir hacia Carreño’l miércoles 31 de xunetu. Mientres, un día enantes, va celebrase’l día del conceyu en Xixón.

Pa finar, intervino Charo Fernández Román, alcaldesa de Ribeseya, conceyu qu’adelanta les sos actividaes a la primer fin de selmana del festival por mor de la coincidencia cola Fiesta de les Piragües, qu’esti añu tien como fecha’l 3 d’agostu. La primer edil destacó la importancia que tien pal so municipiu’l, ún de los más turísticos d’Asturies, l’abrise a los países del arcu atlánticu, sobre manera a la población del Estáu francés, y convidó a tolos visitantes en viaxar nel ‘Bus Arcu Atlánticu’ el domingu 28 de xunetu, qu’inclúi una visita a Tito Bustillo, cueva que tiene escosaes les entraes hasta mediaos d’agostu. El Día de Ribeseya va tener llugar el llunes 29 de xunetu.

Rubiera quixo agradecer a los cinco conceyos l’interés “n’esponer lo meyor de so baxo’l paragües del Festival Arcu Atlánticu” y confirmó que Nava y Cangues d’Onís van participar como observadores esti añu con vistes a la edición próxima.

Na semeya, González Suárez; Verónica Blanco Álvarez, conceyala de Cultura y Teniente de Alcalde de Ribeseya; José Manuel Muñiz, conceyal de Turismo y Fiestes de Carreño; Modesto; Blanco; Rubiera; y González González. Nella ta ausente Sánchez Alonso, representante de Siero, que llegó al actu al poco de comenzar.