El Festival 5º 40’ va pesllar con un espectáculu entamáu pola Banda Gaites Villa de Xixón

‘Villa de Xixón y amigos’ ye’l nome del espectáculu especial que tien programáu esta banda de gaites pal domingu na Plaza Mayor de Xixón. Artistes de la calidá de Tejedor o Anxo Lorenzo van participar nel eventu que va pesllar el Festival 5º 40’.
 
“Trátase del primer conciertu onde la Banda Gaites Villa de Xixón ye la verdadera protagonista, un percorríu por toles vertientes de la música tradicional asturiana en collaboración con más d’un centenar d’artistes de fama internacional”, anuncien dende la banda gaites xixonesa. Asina, ta prevista la presencia, a partir de les 22 hores na Plaza Mayor, de Tejedor, la Orquesta Sinfónica Fase Cuatro, el gallegu Anxo Lorenzo, Rubén Bada, les Pandereteres de Xixón, Coros y Danzas del Real Grupo de Cultura Covadonga, Ismael Tomás, Llangres, Esther Fonseca y los escoceses Lomond and Clyde Pipe Band.
 
Nel espectáculu van estrenase les cuatro primeres obres sinfóniques pa banda de gaites y solistes compuestes por Juan Carlos Casimiro. Les pieces que van sonar resumen los aires más populares de la música tradicional: xota, saltón, pericote y himnu. Hai que destacar que nesta última obra va interpretarse per primer vez l’Himnu Celta.
 
El conciertu entamáu pola Banda Gaites Villa de Xixón va servir de pieslle del Festival Internacional Xixón 5º 40’ que ta celebrándose dende’l martes y pel que pasaron artistes como Héctor Braga, los escoceses Lau, los irlandeses Mairtin O’Connor Band y los bretones Latira y Jacky Molard Acoustic Quartet. Pa la xornada cabera d’esta edición del festival tamién tán previstos xuegos tradicionales al meudía na Plaza Mayor y la celebración del desfile de toles bandes participantes nel XI Festival Internacional de Gaites Villa de Xixón que tuvo llugar ayeri, con salida a les 17 hores de la ponte del Piles y llegada a Campu Valdés. Éstes son la Banda Gaites Villa de Xixón, Banda Gaites Infantil Villa de Xixón ‘Magüeta’, La Reina del Truébano, Banda Gaites La Seronda, Banda Gaitas Manxadoira (Galicia), Lomond & Clide Pipe Band (Alba) y Bagad Cap Caval (Breizh).
 
Últimu ‘Murallón Folk’
 
El Festival Intercélticu d’Occidente (FIDO) tamién va vivir la so última xornada, que va principiar a les 11.30 hoes cola ‘Alborada nel mar’, na punta del Muelle. A lo llargo del día van celebrase delles actividaes per toda Tapia, pa pesllar el FIDO col tercer ‘Murrallón Folk’, a partir de les 23.30 hores na sablera del Murallón, cola participación de los gallegos Faltriqueira y los andaluces Stolen Notes col so reperturiu basáu na música tradicional irlandesa y otros países del Arcu Atlánticu, ente ellos Asturies.