El Farho Xixón Baloncestu gana a ún de los favoritos de la Lliga LEB

El Farho Xixón Baloncestu llogró na tarde d´ayeri una perimportante victoria escontra ún de los equipos con meyor plantiya de la Lliga LEB. El resultáu final de 81-77 foi frutu del gran trabayu que los xugadores locales ficieron nel segundu tiempu del partíu, nel que llograron remontar una diferencia de catorce puntos abaxo (29-43) colos que foron al descansu.

El partíu entamó con un parcial de 13-2 pa los xixoneses, pero un 0-6 de los xugadores foriatos punxo`l lletrónicu con un13-8. Dempués los aragoneses foron entrando nel alcuentru y garraron el mandu del partíu con un 15-16 dempués d´una canasta d´Alberto Angulo, que yá los diba caltener ehí tol primer cuartu, que finó con un 17-21.


El segundu cuartu emprimó mui igualáu, con separtaciones mínimes nel marcador de dos y cuatro puntos ente los dos equipos, hasta que los fallos nel ataque de los xixoneses y la superioridá nel rebote del equipu foriatu permitió-yos que garraran una diferencia de nueve puntos (23-32) cuando faltaben 5´31´´. Les diferencies diben a facese mayores, con un William Keys mui inspiráu qu´encestó nesti cuartu 13 puntos, y finar el cuartu con un 29-43, que ponía les coses mui difíciles pa los xixoneses.


Les coses diben cambiar tres el descansu, nel que los xugadores locales salieron mui centraos y d´entamu llograron un parcial de 6-0, que ponía`l marcador nun 37-43. El Cai Zaragoza tardó 3´24´´ en llograr la primera canasta del cuartu, con un enceste d´Angulo. Otru parcial de 9-0 pa los xixoneses púnxolos delantre nel lletrónicu con un 46-45. El parcial d´esa estaya del partíu foi d´un 17-2 pa los locales. Dempués el partíu foi mui igualáu con ventayes d´ún y de dos puntos pa caún de los equipos y finóse'l cuartu con un empate a 66 puntos. El bon trabayu del equipu xixonés nesti cuartu vese na bona defensa fecha (l´equipu contrariu encestó namás que trelce puntos) y l'aciertu del tiru esterior y de los xugadores interiores.


El caberu cuartu escomencipió cola inseguridá de los dos equipos, que-yos fizo cometer erros y que pasaren dos minutos ensin que naide encestare, hasta qu´un triple de Rubén Suárez traxo la primera ventaya local del periodu, qu´en dellos momentos llegó a ser de cinco puntos, anque`l Cai Zaragoza volvía a averase a ún o dos puntos. Llegóse a los dos últimos minutos con un 72-70, entós Benito Doblado llogró una canasta que ponía un empate a 72 puntos a ún minutu pa finar el partíu. Dempués Chus Poves encestó un triple a 51´´ qu'asitiaba un 75-72. Nes siguientes xugaes tenemos que Keys fízo una personal nun triple que falló a 32´´9 décimes; Alberto Angulo cometió personal sobre Poves a 31´´6 décimes y ésti metió los dos tiros llibres, poniendo un 77-75; una personal de los xixoneses que resolvió Vebobe (77-74); faciendo esti darréu otra personal a Wolfram, a 9´´8 décimes,encestando'l mesmu Wolfram los tiros llibre y poniendo un 79-74; Matías Lescano encesta un triple a 2´´, averándose'l CAI a dos puntos (79-77); pero la última personal de Keys a Poves a 1´´9 décimes robló'l trunfu asturianu, encestando l'equipu local el definitivu 81-77.


Nel Farho Xixón hai de destacar a Brando Wolfram, el meyor xugador del partíu, (19 puntos, 9 rebotes, 1 balón recuperáu, ficiéron-y 6 faltes personales y tuvo 26 puntos de valoración); Chus Poves (20 puntos, 2 rebotes y 2 asistencies); Roberto Morentin (16 puntos, 9 rebotes, 1 asistencia, 2 balones recuperaos y ficiéron-y 4 faltes personales) y Mark Bigrlow (10 puntos, 2 rebotes, 3 asistencies, 2 balones recuperaos y 1 tapón).

Los xugadores más destacaos de Basket Cai Zaragoza fueron Alberto Angulo (18 puntos, 4 rebotes, 1 asistencia, 1 balón recuperáu y ficiéron-y 6 faltes personales) y William Keys (17 puntos, 5 rebotes, 5 asistencies, 3 balones recuperaos y ficiéron-y 4 faltes personales).

Alliniaciones:

Farho Xixón Baloncestu: Josh Fisher (6), Chus Poves (20), Mark Bigalow (10), Roberto Morentin (16) y Brandon Wolfram (19). Tamién xugaron: Rubén Suárez (3), Juan Ignacio Jasen (2), Antxon Iturbe (2) y Iñaki Narros (3).
Basket
Cai Zaragoza: Mario Bruno Fernández (4), Matías Lescano (11), Alberto Angulo (18), Luc Vebobe (7) y Joseph García (10). Tamién xugaron: William Keys (17), Benito Doblado (4), Oliver Arteaga (6) y José Ángel Antelo.

Árbitrios: Germán Francisco Morales y Fermín González. Nengún de los dos equipos tuvo eliminaos por cinco faltes personales. Unes 2500 persones nel Palaciu de Deportes de La Guía.
Parciales per cuartos: 17-21, 12-22, 37-13 y 25-21.