El Domingu de Sidros y Comedies en Valdesoto resiste al coronavirus

Les obres van representase ensin públicu pola situación sanitaria, pero van poder siguise en direuto per TPA, qu'emite tamién un programa'l sábadu sobre les mazcaraes.

Nun añu ensin mazcaraes d'inviernu poles restricciones obligaes pola pandemia de COVID-19, l'Asociación pola Recuperación de los Sidros y Les Comedies ‘El Cencerru’ regala a les asturianes y asturianos un momentu d'espardimientu. El coleutivu de Valdesoto entama'l 'Domingu de Sidros y Comedies' gracies a la ferramienta que ye la TPA, que va llevar a tolos llares del país l'allegría d'estos mazcaritos y de les representaciones dende les 12.15 hores.

Los Escolinos de Faes van poner 'Comedia pa un añu difícil', de Manuel Pergentino Martinez, y mentes que la d'adultos ye un añu más de José Ramón Oliva, qu'esti añu escribe 'Tamos de COVIDmedia'.  Como ye vezu, na obra va facese un repasu a l'actualidá de Valdesoto, Asturies y el mundu en tonu d'humor.

'Momentos de mazcaraes'

El sábadu de tarde TPA tamién va emitir 'Momentos de mazcaraes', un especial nel que van tener espaciu los Sidros y Les Comedies, Os Reises de Tormaleo, Os Reises del Valledor y el Guirria de San Xuan. Va principiar a les 17.45 hores.