El documental ‘Patria querida’ cuenta en TPA la historia y dellos aspeutos del himnu d’Asturies

Esti miércoles, coincidiendo col 8 de setiembre, TPA va estrenar el documental ‘Patria querida’ centráu nel nuesu himnu nacional. Baxo la direición de Xune Elipe, y cola realización de Javier Lueje, rellata la historia y dellos aspeutos d’esti cantar al traviés d’entrevistes con persones del mundu musical, cultural y políticu d'Asturies.

Esti miércoles, coincidiendo col 8 de setiembre, TPA va estrenar el documental ‘Patria querida’, centráu nel nuesu himnu nacional. Baxo la direición de Xune Elipe, y cola realización de Javier Lueje, rellata la historia y dellos aspeutos d’esti cantar al traviés d’entrevistes con persones del mundu musical, cultural y políticu del país.

El musicólogu Héctor Braga, el rabelista Chema Puente, los escritores Marta Mori y Ismael Arias, los gaiteros Andrea Joglar y José M. Guatiérrez, el diputáu ente’l 1983 y el 1986 Manuel Fonseca, los ex conseyeros de Cultura Manuel de la Cera (1983-1990) y Amelia Valcárcel (1993-1995), el fundador de Conceyu Bable Lluis Xabel Álvarez, el pianista Isaac Turienzo y l’ex presidente del país Pedro de Silva (1983-1991) pónense delantre la cámara pa falar de la historia, les carauterístiques musicales, la lletra y la simboloxía del ‘Asturies, patria querida’. Asina va tratase’l so orixe inciertu, la so estensión xeográfica y lo que representa pa los asturianos y asturianes, amás de la so estigmatización, del so componente políticu o de cómo llego a convertise nel himnu oficial d'Asturies nel añu 1984.

Tou ello acompañáu d’imáxenes d'archivu de momentos importantes nel devenir del himnu asturianu y versiones bien distintes del mesmu. Con producción de Goxe, TPA va emitir esti documental de 60 minutos de llargor mañana, 8 de setiembre, a les 22.35 hores.

“Ye una fecha afayadiza pa conocer cómo y porqué un cantar como l'Asturies, patria querida, tan enraigonáu nel sentimientu popular, llegó a convertise nun símbolu colectivu cola so designación como himnu oficial de la comunidá autónoma asturiana”, apunten los sos responsables.