El documental 'El valir económicu d'una llingua', disponible na rede

Asturies.com participó como convidáu nesti proyeutu audiovisual d'Iniciativa pol Asturianu estrenáu nel II Seminariu 'Oficialidá'.

'El valir económicu d'una llingua' ye un documental que presenta l'asturianu "como un elementu de dinamización nel mundu empresarial", amás de "una manera de xenerar empreses, emplegu y riqueza". Empresarios y espertos n'economía o marketing dan nél la so opinión sobre esta cuestión y cuenten esperiencies propies.

Inaciu Iglesias (Cartonajes VIR), Xosé Alba, Ricardo del Río (La Naveta), David M. Rivas, Esther Prieto (Trabe), Amadéu Benavente y Carme Pérez (La Sidra) son dalgunes de les persones a los qu'acudió Iniciativa pol Asturianu pa la ellaboración d'esti documental de cara al II Seminariu ‘Oficialidá, el camín constitucional pal futuru del asturianu’ nel Edificiu Históricu de la Universidá d'Uviéu. Fernando de la Fuente, direutor d'Asturies.com y alministrador d'Araz –empresa editora d'esti diariu dixital–, tamién participó na cinta.