El documental “Suena’l Camín” preséntase en L.lena

El documental "Suena'l Camín" fechu por estudiantes de bachilleratu de La Pola L.lena y que retrata la difícil situación de los músicos asturianos estrénase esti vienres 16 d'avientu a les 7 de la tarde nel Teatru Vital Aza de la Pola L.lena. Asturies.com convida a los sos llectores a asistir al actu y presenta al traviés d'Asturies.com TV un trailer promocional d'esti interesante documental que resultó ganador del concursu "nun nos cuentes películes, failes" que convoca'l Festival Internacional de Cine de Xixón.

Les primeres dificultaes qu'alcuentren los grupos y artistes musicales asturianos pa dar a conocer la so obra y la falta d'apoyu de los medios y instituciones al so llabor son l'argumentu de "Suena'l Camín", un documental fechu por un grupu d'alumnos de bachilleratu que mereció'l premiu del Festival de Cine de Xixón nel certame qu'acuta pa los realizadores más mozos. Como se define la mesma cinta na so presentación "nesti documental apaecen los verdaderos ganadores, los que faen el camín de la música asturiana día a día, ensin descansu, trabayando ensin recibir otra cosa que la satisfacción de tar lluchando por unos ideales, por una cultura amenazada y que ye la suya". Xune, del grupu Dixebra, Anabel Santiago, Alberto Toyos, coordinador de 40 Principales Asturies, "Lafu" monitor del taller de rock de Campumanes, y los grupos La Col.lá Propinde, Dark la eMe y Adición Etílika pasen per esti documental que contrapón les opiniones d'artistes yá con una carrera tres d'ellos coles de los que tan entamando.

Tres de la creación d'esta cinta, la productora "L.luna L.lena" formada por Efrén Álvarez Acebal, Fernando Farpón Alvarez, Jorge Pérez Vázquez, Laura Pola Blanco y María del Carmen Bernardo Rubio, toos ellos alumnos del IES Benedicto Nieto de La Pola L.lena, va facer mañana la so estrena pa la xente de casa. Ello va ser esti vienres 16 d'avientu a les 7 de la tarde na casa de cultura de L.lena, onde, amás de proyectase'l documental, va facese darréu un debate sobre'l mesmu cola participación de Penélope Miranda, de la Oficina de Normalización Llingüística de La Pola L.lena, Lafu, monitor del Taller de rock de Campumanes y Dolfu Rodriguez, del grupu "DRD". Una actuación musical cola presencia yá confirmada de DRD, que sustituyen a Xuacu Amieva, el cuartetu Rebeca Velasco y el grupu "Los Pingüinos Asesinos" formáu por alumnos de primaria va pesllar l'actu, al que van asistir personalidaes de la política como l'alcalde de L.lena Hugo Morán o la conceyala de cultura Paz García, amás del director de política llingüística Ramón d'Andrés.