El discursu d'Areces

El debate sobre l'estáu d'Asturies sigue güei na Xunta Xeneral del Principáu, onde ayeri'l Presidente del executivu asturianu lleó'l discursu d'intención Política col qu'anicia'l debate. Amás de les rederencies al asturianu (que ye materia por primer vez nel debate) Areces dio llectura a la riestra de proyectos colos que cuenta que se trabaye esti añu .

Ente les necesidaes básiques d'infraestructures, Areces comprometióse otra vegada más a sacar alantre les línies d'alta tensión Soto-Penagos y Lada-Velilla, ún de los temes recurrentes yá dende la llexislatura anterior. Sobre les carreteres, el presidente dixo qu'habría que "alcanzar alcuerdos sobre'l trazáu de l'autovía del Cantábricu na zona occidental y la del Sella. L'amplliación del Puertu del Musel ye otru de los temes que nunca nun dexen de salir, y plantegose otra vez más como "necesaria". En rellación a los temes que más guerra tan dándo-y al executivu asturianu cola alministración estatal, Areces reclamó la xestión integral del Parque Nacional de Los Picos d'Europa, les indemnizaciones "que nos correspuenden" pol desatre del "Prestige" y la retirada del portalgu n'Autopista del Val.le Güerna. En cuantes a losenllaces de l'autovía minera, polos qu'hai una engarrada cásique permanente ente Fomentu y conseyería d'Infraestructures, Areces dixo qu'habría que "buscar financiación". La creación de la rede de corredores internos y la duplicación de carriles na carretera AS-18, que ta acabante d'estrenar, completaron esti separtáu.

Areces emponderó l'éxitu del pactu pol emplegu y la modernización de la economía asturiana, calificando la educación y el sistema sanitariu como "los principales activos sociales" del país. Nel terrén social, el presidente fizo referencia a la dificultá d'accesu a la vivienda, que va ser "un de los temes prioritarios na concertación social", asuntu nel que fizo referencia a l'ingresu básicu prometíu nel pautu PSOE - IX/BPA

En política cultural, aparte de les referenciesal asturianu, lo más importante foi la declaración esplícita de sacar alantre la TV autonómica. Anque'l PP tien capacidá de vetar el desarrollu del ente, Areces prometió desarrollar los "instrumentos necesarios para la producción y difusión de sus contenidos".

Los ataques más duros contra'l gobiernu central nel discursu vinieron a cuenta de la xestión de la catástrofe del Prestige y de la política financiera, que Areces calificó de "deslleal" en cuantes que'l gobiernu español taría resquiebrando'l pautu de financiación coles comunidaes. esto sedria asina porque'l gobiernu ta dando de pasu lleis qu'afecten a la financiació autonómica ensin contar coles CCAA, citando'l casu de la LOCE, y tamién por anunciar baxaes y retiraes d'impuestos (casu del de sucesiones) que tan nos pegoyos de la financiación de les CCAA.

Ente les ausencies más llamatives del discursu, anque esti incluyó una bona parrafada sobre'l desarrollu estatutariu y l'asunción de competencies nueves, llama l'atenció que nun hubiere referencia denguna a hipotétiques reformes estaturies, cosa que'l PSOE plantega como ún de lossos ppuntos programáticos a nivel estatal.