“El discu va contar con 14 pieces, de les que 4 son cantaes”, confirma Mielgo sobre l’esperáu trabayu de Llan de Cubel

|
Llan de Cubel reducida

“Va salir esti añu”, asegura'l percusionista Fonsu Mielgo en referencia al que va ser el sestu de discu de Llan de Cubel, que “va contar con 14 pieces, de les que 4 son cantaes”. El grupu folk actúa’l sábadu nel Intercélticu d’Avilés, que dedica’l vienres al folk-rock.

Ensin plazos definitivos entovía al tar ultimando los detalles últimos, como la discográfica o les plataformes nes que se va llanzar, l’esperáu discu de Llan de Cubel yá ta grabáu y ta a piques de ser una realidá. Detrés queden venti años de llabor, “yá que empezamos a trabayar temes del mesmu enantes d’asoleyar el discu anterior”, ‘Un tiempu meyor’, editáu por Fonoastur nel 1999.

Cancioneros como’l de Torner, el de Maya y Lavandera, el de Víctor Sáez o'l de Baldomero Fernández, grabaciones de campu “previes al gran trabayu que desendolcó Ambás” y composiciones propies foron la base sobre les que se desarrollaron les pieces del álbum nuevu. Ésti finalmente va contar “con 14, de les que 4 son cantaes”, avanza Mielgo.

Dalgunos d’ellos van poder sentise la nueche del sábadu nel tamién esperáu conciertu programáu pol Festival Intercélticu d’Avilés y Comarca, que vien celebrándose dende’l domingu, xunto con temes habituales del repertoriu del grupu, que namái tien confirmada esta fecha pa tol branu. Llan de Cubel va salir a escena depués de los escoceses Dallahan, que van abrir la nueche na carpa astitiada en La Esplanada a les 23 hores.

Pa esta cita la banda va contar cola so formación habitual, Mielgo, Elías García, Xel Pereda, Simon Bradley y Xuan Rodríguez, xunto con Borja Baragaño, flautista que vien acompañando a la banda nes actuaciones últimes. Una nueche que “promete ser espectacular”, como destacó Juan Luis Casas, presidente d’Esbardu y organizador del festival, y que va sirvir tamién d’alcordanza del fináu Aurelio Argel.

Dixebra y Spanta la Xente

El vienres, mentes, l’Intercélticu avilesín presenta otra xornada especial, dedicada nesti casu al folk-rock. Los ḷḷenizos Spanta la Xente van ser los encargaos de dar entamu a la mesma a les 22.30 hores, pa depués dar pasu a los llocales Dixebra.

Les actividaes del festival van siguir hasta’l domingu, con un programa ampliu y variáu. No musical, esta nueche ye’l turnu de Tuenda y d’una folixa de temática gallega.

Contador Estadistiques