El discu rayáu de Josefina Martínez

Nel últimu congresu del Institutu Cervantes sobre la "diversidá del español" celebráu en Valladolid, la filóloga Josefina Martínez, conocida pola so postura contraria dafechu a la normalización de la llingua asturiana, lleó esta ponencia sobre "El español de los territorios del noroeste" na ques se despacha bien a gustu sobre l'asturianu. Amás de descalificalu por completu como llingua, ximelgando otra vuelta los espantayos y mitos más vieyos sobre la dialectalidá del asturianu y sobre lo inútil que ye "ponese a inventar una llingua" la veterana profesora echa pa contra instituciones asturianes tan afitaes como l'Academia de la Llingua y ataca, nun artículu supuestamente científicu, con descalificaciones personales como "mentecatos" qu'aplica en xenérico a tolos qu'intenten espresase n'asturianu. Josefina amás afirma categóricamente que "El español es en el Principado de Asturias, desde hace siglos, el vehículo de comunicación, no sólo para la expresión escrita, sino también para la oral."L'artículu de Josefina Martínez ta entamando una polémica curiosa nos tableros d'Anuncies d'Asturies.com. Una persona especialmente esmolecía poles opiniones de la filóloga llegó a escribi-y al Institutu Cervantes pidiendo esplicaciones sobre por qué se permitíen estes opioniones acientífiques y faltoses nel congresu. La polémica entera pue seguise nos tableros d'anuncies d'Asturies.com, qu'aprovechamos de pasu pa pidir que la xente que s'esprese nellos lo faiga con total llibertá pa opinar pero ensin faltar a les normes más elementales d'educación y respetu, porque tener qu'esborriar mensaxes insultantes nun ye xera prestoso pa naide.

Contador Estadistiques