El discu-llibru 'Ente la niebla' de Dixebra algama la segunda edición

Asoleyóse a lo último del mes d'abril.

Ocho meses y mediu depués de salir a la venta, el discu-llibru conceptual de Dixebra 'Ente la niebla' (Goxe Producciones) cuenta con una segunda tirada de 500 exemplares. La primera, formada tamién por mediu millar de copies, yá ta escosada dafechu.

Unes cifres que confirmen la gran receición ente'l públicu del últimu trabayu de la banda avilesina, una reflexón y exerciciu de memoria sobre la historia de les clases populares y trabayadores asturianes. 'Ente la niebla' ta disponible nes llibreríes Trabe y Cervantes, n'Uviéu; en Paradiso, en Xixón; n'El Cafetón, n'Avilés; en La Llocura, en Mieres;y na Fnac, nel centru comercial Parque Principado.