El discu de Misiva ‘Gran mentira’ yá ta disponible en formatu físicu

Les tiendes de música de tol Estáu yá tienen a la venta en formatu físicu ‘Gran mentira’, el segundu llarga duración de Misiva. La banda de punk-rock moscona celebra esta noticia protagonizando’l domingu na TPA ‘El Club Musical’.

Tres sacar esti discu en formatu dixital cola discográfica valenciana Maldito Digital nel mes de xunetu, esta selmana principió la distribución en tiendes d’esti doble CD de diseñu cuidáu, con cantares rápidos y reivindicativos tanto n’asturianu como castellanu, siguiendo asina l’apuesta billingüe cola echó a andar el grupu. “Son trece temes llenos d’enerxía, velocidá y reivindicación nos que siguimos madurando la propuesta y el soníu del ‘Parte de la solución’ con temes de punk rock rápidu y melódicu na onda de bandes como Bad Religion, Rise Against, NOFX, etc.”, señalen los de Grau na so páxina web, que pronto van presentar el discu con un conciertu. Como ufierta de llanzamientu, Maldito Digital da la posibilidá de mercar on line el doble CD y una camiseta de la banda al preciu de 19,95 euros.

Coincidiendo cola salida a la venta de ‘Gran mentira’, Misiva va protagonizar el capítulu 12 de ‘El Club Musical’, programa dedicáu a la música fecha n’Asturies que presenta Xune Elipe y que s’emite los domingos a les 23.30 hores na TPA. Nél, la banda va interpretar dellos temes d’esti trabayu.