El diputáu vascu Oskar Matute va poner una charra nel Día de la Mocedá Revolucionario

|
Cartelu Día de la Mocedá Revolucionario (DMR) 2018

Esti sábadu celébrase una edición nueva del Día de la Mocedá Revolucionario (DMR) qu’entama Darréu n'Uviéu en conmemoración de la Revolución d’Ochobre del 34. Oskar Matute, d’EH Bildu, participa como convidáu nuna xornada que va zarrase cola decimoquinta edición del conciertu Asturies Nun Escaez.

L’actividá va comenzar al meudía con un Alcuentru Internacionalista nel Llar La Llegra, onde les organizaciones xuveniles desplazaes a Asturies van aldericar y esponer delles cuestiones sobre la realidá de los sos países “poniéndoles en comuña pa deprender y avanzar”, espliquen dende Darréu. Depués d'ello, hacia les 14 hores, va entamase una xinta popular, con un preciu de 5 euros.

Matute, diputáu nel Congresu d'EH Bildu por Bizkaia, va poner a les 17 hores la conferencia ‘Repúbliques y procesos constituyentes. Baltiando’l réxime del 78’. La xornada va finar col XV Asturies Nun Escaez, que va contar cola participación de La Tarrancha y la banda punk-folk madrilana Brutus Daughters, amás de Fruela 757 cola so propuesta na qu'amiesta música electrónica con pieces tradicionales.

El preciu de les entraes ye de 5 euros, de manera anticipada, y de 8, na puerta. Próximamente van poder mercase nos siguientes puntos: La Luna y L'Esperteyu, n'Uviéu; Centru Social La Semiente, en L'Entregu; Matteria, en La Felguera; L'Abellugu, en Mieres; Diañu, en La Pola Siero; sidrería Canteli, en Xixón; y La Traviesa, en L'Infiestu, amás de pela rede nesti enllaz.

Bloque soberanista contra la monarquía

Darréu va participarel esta tarde nel bloque soberanista entamáu por #LluchandoPolaSoberanía "pa volver a glayar bien alto qu'Asturies Nun Tien Rei; que la mocedá asturiano ta farta d'imposiciones y de corrupción". La cita ye a les 17 hores na Escandalera coincidiendo cola gala d'entrega de los Premios Princesa de Asturias nel uvieín Teatru Campoamor.

Contador Estadistiques