El diputáu de Foro Martínez Oblanca enguedéyase col BOE

|
Bilordiu Instituto Cervantes y Euskal Herriko Unibertsitatea

Un bilordiu que circula peles redes sociales, que tien la mesma naturaleza qu’otru que tuvo puxu’l branu pasáu, terminó nuna entruga nel Congresu al Gobiernu por parte de Foro. Trátase d’una anuncia del BOE del pasáu 28 d'avientu sobre un conveniu pa formar maestros pa dar llingua castellana a estranxeros.

En concreto ye ente l’Instituto Cervantes y la Euskal Herriko Unibertsitatea (UPV/EHU) “para la formación de profesorado en el ámbito de la enseñanza del español como lengua extranjera”. Un conveniu que ye habitual ente les universidaes del Estáu y esta organización pública que tien como oxetivu promover en tol mundu’l castellanu.

Sicasí, en redes sociales difundióse una captura d’esta entrada del BOE del 28 d’avientu con un testu sorrayáu y una información que daba a entender que l’español ye considerada como una llingua estranxera n’Euskadi. Nun tardaría esti bilordiu n’espardise, amosando una vegada más el peligru de les noticies falses y el poder qu’éstes pueden llegar a tener y influenciar a la sociedá hasta’l puntu d’acabar nuna entruga al Gobiernu nel Congresu.

“¿Falamos los españoles un ‘lenguaje extranjero’ nel nuesu propiu país?”, plantégase Isidro Martínez Oblanca, que nun comunicáu apunta que “llama l’atención y la perplexidá, cuando non el plasmu, que nesti conveniu se considerase l’idioma español como llingua estranxera nuna institución universitaria española y venceyada a una comunidá autónoma española, entá más cuando ún de los promotores del referíu conveniu ye l’Instituto Cervantes que se define como una “institución pública creada por España en 1991 para promover universalmente la enseñanza, el estudio y el uso del español””. En total, el congresista de Foro rexistró cuatro entrugues al respeuto pal Gobiernu:

  1. ¿Considera’l Gobiernu de España que tien xacíu tachar de ‘lengua extranjera’ al español n’España?
  2. ¿Dende cuándo’l Ministeriu d’Asuntos Esteriores, Xunión Europea y Cooperación y l’Instituto Cervantes consideren l’enseñu nel nuesu propio país del español como ‘lengua extranjera”?
  3. ¿Falamos los españoles un ‘lenguaje extranjero’ nel nuesu propiu país?
  4. ¿Qué actividaes tien previstes el Gobiernu  pa la organización conxunta d’actividaes de formación de profesoráu nel ámbitu de la enseñanza del español como ‘lengua extranjera’?

Munchos usuarios, al enterase de la equivocación, nun tardaron n’esborriar los sos tweets. A la hora d’espublizar esta noticia, Martínez Oblanca caltenía’l de so na so muria.

Contador Estadistiques