El diputáu Faustino Álvarez pidió frenar la perda de falantes d’asturianu

El diputáu socialista na Xunta Xeneral del Principáu Faustino Álvarez intervino ayeri nel ciclu de conferencies entamáu pola Agrupación Socialista de Xixón. El tamién miembru de la fundación Caveda y Nava prendió la voz d'alarma énte los asistentes al actu asoleyando los datos más dramáticos enxertos nel Estudiu Sociollingüísticu de Francisco Llera Ramo, qu'alvierte que de va diez años p'acá perdióse la metada de los falantes d'asturianu, lo que supón una crisis qu'ataca a la sobrevivencia del idioma y qu'ha torgase per aciu d'un pautu social.

Sigún Faustino Álvarez, que sorrayó la idea de que ye preciso garantizar l'usu y la visibilidá del asturianu na sociedá, independientemente de qu'haya oficialidá o non, la TV autonómica ha tener un papel clave nesa visibilidá. El diputáu socialista barrió pa casa y refugó les crítiques contra l'antiasturianismu del PSOE, afirmando que'l so partíu tuvo tres d'emburriones a la normalización como la creación de l'Academia de la Llingua o de la Xunta de Toponimia.